Ma shingrüyning islahatni chongqurlashturush nishani yenila muqimliqqa, bingtüen bilen yerlikni birleshtürüshke merkezleshken

Washin'gtondin muxbirimiz jewlan teyyarlidi
2024.02.19

“Tengritagh tori”, “Shinjang géziti” torining 19-féwral chiqarghan xewirige qarighanda, Uyghur aptonom rayonluq partkom sékrétari ma shingrüy 2-ayning 19-küni échilghan “Islahatni omumyüzlük chongqurlashturush islahat komitéti” chaqirghan yighinda söz qilip, bingtüen bilen yerlikning bir gewdilishishini tézlitish üchün bingtüen bilen yerlik partkom rehberlikining hemkarliqi we mes'uliyet tüzümini kücheytish, bingtüen bilen yerliktiki her millet xelqining ittipaqliship, medeniyette yughurulup kétishini emelge ashurush, bingtüen bilen yerlikning iqtisadiy jehettiki gireleshme tereqqiyatini ilgiri sürüsh qatarliqlarni tekitligen.

Ma shingrüy bu qétim yene, “Shinjangning muqimliqini saqlashni birinchi orun'gha qoyush” heqqide yolyoruq bergen, buning üchün “Térrorluqqa qarshi turup muqimliqni qoghdashni qanun-tüzüm jehettin kücheytish” kéreklikini tekitligen. Bu emeliyette xitay da'irilirining sabiq emeldar chén chüen'go dewridin bashlap kücheytken “Térrorluqqa qarshi turup muqimliqni qoghdashni da'imlashturush” siyasitining emdi dawamliq ijra qilidighan qanun-tüzümge özgirip, Uyghurlarni dawamliq basturushning qebih wasitisige aylan'ghanliqidin dérek bergen.

Bingtüen qurulghandin buyan, xitay merkiziy hökümiti uni “Shinjangning muqimliqini saqlash” ning herbiy we iqtisadiy tayanch küchi qilip kéliwatqan bolup, adriyan zénz qatarliq tetqiqatchilarning doklatidin qarighanda, shi jinping hoquq tutqan 10 yil mabeynide bingtüen alahide étibargha ériship, bir yaqtin Uyghurlarni keng kölemlik basturushqa qatnashsa, bir yaqtin yüz minglighan lagér tutqunlirini qul emgikige sélip, uningdin paydilinip kelgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.