Амерка кеңәш палата әзаси марку рубийо кеңәш палатасиға “уйғур сиясити қанун лайиһәси” сунған

Мухбиримиз әркин
2022.04.08
Share on WhatsApp
Share on WhatsApp

Америка кеңәш палатасиниң җумһурийәтчиләр партийәсидин болған әзаси марку рубийо уйғурларни қоғдашқа аит йәнә бир қанун лайиһәси тәйярлап кеңәш палатасиға сунған.

Мәлум болушичә, у тәйярлиған “уйғур сиясити қанун лайиһәси” америка вә башқа дөләтләрдики уйғур муһаҗирлирини қоллашни күчәйтиш, шундақла кишилик һәқ-һоқуқлири хитай компартийәсиниң дәпсәндичиликигә учраватқан уйғурларниң әһвалини яхшилаш үчүн һәрикәт қилишни мәқсәт қилған икән. Бу қанун лайиһәсиниң бир нусхаси илгири авам палатасида җумһурийәтчи авам палата әзаси йоң ким билән демократчи авам палата әзаси аме бера тәрипидин оттуриған қоюлған иди.

“уйғур сиясити қанун лайиһәси” ниң кеңәш палатасидиму оттуриға қоюлуши, униң қанунға айлинишниң йолини ечиштики һалқилиқ қәдәм, дәп қаралмақта. Марку рубийо бу һәқтики баянатида мундақ дегән: “хитай компартийәси уйғурларға вә көп санлиқи мусулман болған башқа аз санлиқ милләтләргә қарита йиргинишлик ирқий қирғинчилиқ вә кишилик һоқуқ дәпсәндичилики елип бармақта. Америка бу қорқунчлиқ хорлашқа сүкүт қилалмайду.”

Марку рубийо йәнә “мән уйғурларға болған тонушни вә қоғдашни күчүйтиш үчүн қанун лайиһәси сунғанлиқимдин иптихарлинимән вә шундақла мәсләкдашлиримни бу қанун лайиһәсини тезрақ мақуллашқа чақиримән,” дегән.

Мәлум болушичә, мәзкур қанун лайиһәси америка ташқий ишлар министирлиқиниң уйғур кишилик һоқуқ паалийәтчилирини америка нутуқ программмисиға киргүзүп, мусулман дөләтлиридики аммивий дипломатийә мунбәрлиридә уйғур вә башқа мусулман милләтләр учраватқан дәпсәндичиликни сөзләшкә орунлаштуруш; хитай билән болған дипломатик учришишиларда уйғур районидики лагерларни зиярәт қилиш; уйғур тутқунлирини қоюп беришкә капаләтлик қилишниң истиратегийәсини бәлгиләш; америка дипломатлирини уйғур тилида тәрбийәләш; хитай, түркийә вә уйғурлар көпрәк яшайдиған башқа дөләтләрдики америка дипломатик орунлирида аз дегәндә бирдин уйғур тили билидиған хадимлар болуш; американиң б д т дики әлчисигә б д т да уйғур вә шинҗаң уйғур аптоном райониға мунасивәтлик паалийәтләргә кашила қилишқа алақидар һәрқандақ қарарға қарши туруш тоғрисида буйруқ бериш, қатарлиқларни өз ичигә алған икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт