Xitay hökümiti marko rubiyoning isim-familisining xitayche yézilishini özgertish arqiliq özini bi'ep ehwaldin qutuldurmaqchi bolghan

Xitay hökümiti amérikaning yéngidin teyinlen'gen tashqi ishlar ministiri marko rubiyoning xitayche ismini özgertish arqiliq, amérika bilen bolidighan tashqi munasiwetning normal dawamlishishigha yol achmaqchi bolghan.

Amérikadiki “Heptilik xewerler” torining 22-yanwar bu heqte bergen xewirige qarighanda, xitay tashqi ishlar ministirliqi 16-yanwar küni marko rubiyoning “Xitay oghriliq we aldamchiliq bilen derijidin tashqiri küchke aylandi” dégen sözige qarita bergen bayanatida, marko rubiyo (Marco Rubio) ning xitayche xet bilen yézilghan ismidiki birinchi boghum “Lu” (卢) dégen xetni shuninggha ahangdash bolghan, emma menisi oxshimaydighan “Lu” (鲁) dégen xetke özgertken. Shuning bilen marko rubiyoning xitaychidiki ismi 马克. 卢比奥 Din 马克. 鲁比奥 Gha özgergen.

22-Yanwar küni xitay tashqi ishlar ministirliqining axbarat élan qilish yighinida, bayanatchi maw ning bu heqtiki so'algha jawab bérip, marko rubiyoning xitayche ismigha qarighanda, uning in'glizche ismining muhim ikenlikini bildürgen. U yene muxbirning, ‛marko rubiyoning ismini özgertish uninggha bérilgen jaza cheklimisini bikar qilishtin dérek béremdu?‚ dégen so'aligha jawab bérip, “Xitayning jazasi xitaygha ziyanliq her qandaq söz-heriketni chekleshke qaritilghan” dégen.

Xewerde neqil élin'ghan mutexessislerning sözige asaslan'ghanda, chet ellik muhim siyasiy erbablarning ismini xitay tashqi ishlar ministirliqi bilen shinxu'a agéntliqi terjime bölümi békitidiken. Marko rubiyoning ismini ular muzakire qilip békitken bolushi mumkin iken, chünki mushundaq qilghanda xitay hökümitining jaza bergini burunqi rubiyo, hazirqisi bolsa amérika tashqi ishlar ministiri marko rubiyo bolidiken-de, xitay hökümiti bi'ep ehwalgha chüshüp qalmaydiken.

Amérikadiki jumhuriyetchiler ichide xitaygha qarshi keskin meydani bilen tonulghan siyasetchi marko robiyo xitayning Uyghurlargha qollan'ghan irqiy qirghinchiliq siyasiti we xongkongdiki démokratiye herikitini basturushini qattiq eyibligenliki üchün, 2020-yil xitay hökümiti uninggha ikki qétim jaza cheklimisi qoyghanidi.