Xelq'ara olimpik komitéti Uyghur diyaridiki xitay shirkiti bilen kiyim toxtami tüzgen

Muxbirimiz eziz
2021-12-29
Share

Yéqinda xelq'ara olimpik komitétining 2021-yilidiki tokyo yazliq olimpik musabiqisi we 2022-yilidiki béyjing qishliq olimpik musabiqisi üchün Uyghur diyaridiki bir qisim xitay shirketliri bilen olimpik tenheriket kiyimi tikish toxtami tüzgenliki ashkarilandi.

Axios Torining 28-dékabirdiki xewiride éytilishiche, bu shirketlerning ishlitiwatqini Uyghur diyaridiki paxta mehsulatliri bolup, bularning Uyghur mejburiy emgiki bilen zich baghlinishliq ikenliki yéqinqi mezgillerde zor ghulghuligha seweb boluwatqanidi. Bolupmu shular qataridiki “Xéngyu'enshyang” shirkiti olimpik komitéti üchün olimpik formisini tikip bérish toxtamigha qol qoyghan bolup, ularning xelq'ara olimpik komitéti bilen bolghan munasiwiti 2008-yilidiki béyjing olimpik musabiqisidin buyan izchil dawam qilip kelgeniken. Mezkur shirket bilen qoyuq alaqide boluwatqan eng chong tor sodisi munbiri tawbaw shirkiti bolsa Uyghur diyaridiki paxta mehsulatliri köplep sétilidighan sorunlarning biri iken.

Xelq'ara emgekchiler heqliri birleshmisining tetqiqatchisi pénélop kiyritis bu heqte söz qilip “Xelq'ara olimpik komitéti Uyghur rayonida mehsulat ishlepchiqiriwatqan shirketler bilen alaqide bolmasliqi kérek idi. Ularning bu herikiti ashu mehsulatlargha shérik bolushtin bashqa xelq'arada yene buning élanini qilip bergenlikke barawer” dégen. Emma “Xéngyu'enshyang guruhi” ning bayanatchisi bu heqtiki so'allargha jawab bérip؛ “Biz xelq'ara olimpik komitéti üchün teyyarlap bergen kiyimlerge ishlitilgen paxta dölitimizning sirtidiki jaylardin import qilin'ghan” dégen. Emma bu mehsulatlarning import qilinishigha da'ir höjjet yaki guwahnamilerni körsitip bérelmigen. Kishilik hoquqni közitish teshkilati xitay bölümining diréktori soféy réchardson xanim bu ehwalni eyiblep: “Xelq'ara olimpik komitétining Uyghur mejburiy emgikige baghlinishliq xitay shirkiti bilen kiyim tikish toxtami tüzüshi bekmu nomusluq bir qilmish. Eslide ular buning eksini qilsa bolatti” dep körsetken.

Xelq'ara olimpik komitétining bu xildiki qilmishliri köp bolghanliqtin béyjing qishliq olimpik musabiqisi izchil her sahening keskin tenqidlirige, shuningdek bir qisim hökümetlerning bayqut qilishigha duch kelgenidi. 29-Dékabir küni “Yehudiylar dunyani közitish teshkilati” özlirining tiwéttir bétide uchur yollap “1936-Yili natsistlar gérmaniyesi olimpik musabiqisini teshwiqat qorali qilip jaza lagérlirida yehudiylarni qirghin qilghanidi. Milyonlarche Uyghurni jaza lagérlirigha qamap bolghan xitay kompartiyesi 2022-yili olimpik musabiqisini yene bir qétim teshwiqat qorali qilmaqchi boluwatidu” dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet