“Küntaxta émpériyesining gunah-jinayetliri” namliq yéngi doklat élan qilindi

Amérikadiki “Bösüsh tetqiqat instituti” (Breakthrough Institute) 18-noyabir küni Uyghur rayonidiki “Küntaxta émpériyesining gunah-jinayetliri” namliq bir doklatni élan qilghan bolp, uningda mejburiy emgek mehsulatlirining tipik namayendisi bolghan küntaxta ishlepchiqirishi muhim téma qilin'ghan.

Chong hejimlik bu doklatta, ötken on yilda dunyadiki küntaxta yasash sana'itining  kishilik hoquq depsendichliki bilen chétishliq mesilige aylinip qalghanliqi, küntaxtigha meblegh salghuchilar bilen küntaxta sodisi qilghuchilarning menpe'etining asasen Uyghur rayonidin chiqidighan küntaxtigha baghlinip qalghanliqi, chünki küntaxta yasaydighan xitay shirketlirining hökümetning étibar siyasiti we qul emgikidin shekillen'gen erzan emgek küchi bilen zor paydigha érishishke urunup kelgenliki, amérikaning bu mehsulatni cheklesh qanuni bilen uninggha bolghan éhtiyaj we paydini közlewatqan shirketler otturisida dawam qiliwatqan keskin küreshler tepsiliy otturigha qoyulghan.

Bu doklatta bügünki dunyadiki küntaxta sana'iti we bazirining tarqilish ehwali, Uyghur rayonida téz sür'ette ashqan küntaxta  ishlepchiqirishi we ezan emgek küchidin paydilinish ewzelliki, shu sewebtin éship ketken mejburiy emgek zulumi, küntaxtigha kétidighan kiristalliq kirimniy ishlepchiqirish jeryanida qoyup bérilidighan bulghima we nachar emgek muhiti qatarliqlar resim we grafiklar bilen körsitilgen. Andin bu qul emgiki mesilisining sezgür kishilik hoquq mesilisige aylan'ghanliqi we Uyghur rayonidin chiqidighan küntaxtilarning sétilish we cheklinish ehwali üstide muhakime yürgüzülgen. Axirida xitayda hélihem gülliniwatqan küntaxta sana'itining kilimat bulghinishi we kishilik hoquq depsendichilikini éghirlashturush xetiridin agahlandurush bérilgen.