Хитай мәкит наһийәсидин 1025 нәпәр уйғур яшни “ишләмчи”намида ичкири өлкиләргә йөткигән

Мухбиримиз әркин
2020.01.13
Share on WhatsApp
Share on WhatsApp

Хитай һөкүмити “йеза ешинча әмгәк күчлири” намидики уйғур яшлирини ичкири өлкиләрдики завут-карханиларда ишләмчиликкә йөткәшни давамлаштурмақта. Хитай таратқулириниң ашкарлишичә, хитай һөкүмити 10‏-январ күни мәкит наһийәсидин 1025 нәпәр уйғур яшни хитайниң шәндоң, лявниң, җеҗяң қатарлиқ 8 өлкисидики завут -карханиларға ишләмчиликкә йөткигән. Бу , 2020‏-йили киргәндин бери уйғур дияриниң бир наһийәсидинла хитайниң ичкири өлкилиригә бир қетимда әң көп уйғур ишләмчиниң йөткилишидур.

Хитай һөкүмити уйғурларни “ишқа орунлаштуруш” намида йөткәп, хитай завут-карханилирида мәҗбури әмгәккә селиш билән әйиблиниватқан мәзгилдә уйғур яшлириниң “ишләмчи” дегән намда зор  түркүмләп йөткилиши диққәт қозғайдиған мәсилигә айлинип қалған. Хитай һөкүмити мәзкур мәсилидә уйғур аилиләрни парчилап, миңлиған уйғур балилириниң ата-анисиз қелиши, уйғурларниң мәдәнийити, ана тили, диний етиқади вә турмуш усули билән болған беғиниң бузғунчилиққа учришини кәлтүрүп чиқириш билән әйиблинип кәлгән.  Даириләр өткән һәптә 2018- вә 2019‏-йиллири уйғур ишләмчиләрни йөткәштә рекорт яратқанлиқи, бу мәзгил ичидә райондики  22 наһийәдин 140 миң ишләмчини йөткәп, 3 йиллиқ пиланни бир йил бурун орундиғанлиқини елан қилғаниди.

“шинҗаң хәвәрлири” ториниң 13‏-январ ашкарлишичә, мәкит наһийәлик парткомниң пилани бу йил ичидә мәзкур наһийәдин  ичкири өлкиләргә вә район ичигә 5000 уйғур яшни йөткәш икән. Хитай һөкүмити уйғурларниң “кәспий тәрбийәләш мәркәзлири ” намидики орунларда дөләт тили, қанун вә кәспий тәрбийә елип, ишқа орунлишишиға ярдәм қиливатқанлиқини илгири сүрсиму, лекин шаһитларниң гуваһлиқи вә кишилик һоқуқ тәшкилатлириниң доклатлирида хитайниң лагирдики тутқунларни завут -карханиларға йөткәп, мәҗбури әмгәккә селиватқанлиқи,  бу арқилиқ уларниң мәдәнийити, тили, диний етиқади билән болған беғини үзүп ташлашни мәқсәт қилғанлиқи тәкитләнмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.