Даириләр хотәнниң лоп наһийәсидики йезиларда «мәсчиткә кириш кинишкиси» тарқатқан

Мухбиримиз қутлан
2015-06-29
Елхәт
Пикир
Share
Принт

Бу йиллиқ рамзан киргәндин буян хитай даирилириниң уйғур елида йүргүзүватқан дәриҗидин ташқири диний чәклимиси хәлқара җәмийәтниң күчлүк диққитини қозғимақта.

Мәлум болушичә, йеқинда хотәнниң лоп наһийәсигә қарашлиқ нава йезисидики гапа ариш кәнти өз тәвәсидики аһалиләргә «мәсчиткә кириш кинишкиси» тарқатқан.

Буниң билән йәрлик мусулманларниң халиғанчә өз тәвәсидики мәсчитләргә кирип намаз оқуши қаттиқ чәклимигә дуч кәлгән.

Игилинишичә, кәнт секретари, кәнт аманлиқ мудири һәмдә кәнт сақчилири һәр қетимлиқ намаз вақтида, болупму җүмә намизи вә рамзан мәзгилидики тәрави намизи оқулидиған чағларда мәсчитниң дәрвазисида көзәттә туридикән. «Мәсчиткә кириш кинишкиси» болмиған яки 18 яштин төвән болғанларни мәсчиткә кириштин тосайдикән.

«Гапа ариш кәнтлик ислам дини җәмийити алақә гурупписи» намида тарқитилған мәзкур кинишка иҗтимаий таратқуларға ашкара болғандин кейин уйғур ели вә хәлқарада күчлүк инкас пәйда қилған. Уйғур аптоном райони тәвәсидә адәттә наһийә дәриҗилик сиясий кеңәш яки диний ишлар идариси қармиқида «ислам дини җәмийити» тәсис қилиниду. Һалбуки, нөвәттә йеза-кәнтләргә қәдәр аталмиш «ислам дини җәмийити» қурулуп, уларниң өз алдиға «мәсчиткә кириш кинишкиси» тарқитиши районда мусулманларға болған диний бесим вә назарәтниң қайси дәриҗигә йетип барғанлиқини ашкара қилмақта.

Пикирләр (0)
Share
Толуқ бәт