Xitay hökümiti mayk gallagérgha jaza élan qildi

Amérika kéngesh palatasining ezasi, “Amérika-xitay istratégiyelik riqabet pewqul'adde komitéti” ning sabiq re'isi mayk gallagér (Mike Gallagher) 21-mayda yene bir qétim herqaysi axbarat wasitilirining diqqet merkizige aylandi. Shu küni xitay hökümiti élan qilghan uninggha qarshi jaza herqaysi sahening zor diqqitini qozghidi.

“NBC Xewerliri” ning shu kündiki xewiride éytilishiche, mayk gallagér 2024-yili aprélda özining re'islik xizmitidin istépa bergen bolup, bu jazaning emdilikte élan qilinishi kishilerni heyran qaldurghan. Mayk gallagér heqqidiki jaza toghrisida söz qilghan xitay tashqi ishlar ministirliqi uni “Bizning ichki ishlirimizgha arilashqanliqi üchün biz bu jazani élan qilduq” dep eyibligen. Shuningdek uning xitaygha bérishi men'iy qilinidighanliqi, uning xitaydiki mal-mülki bayqalsa, uni tonglitidighanliqi, shuningdek xitaydiki héchqandaq teshkilat yaki shirketning uning bilen soda alaqisida bolushi cheklinidighanliqini bildürgen.

Melum bolushiche, gallagér yillardin buyan xitayni eng keskin tenqidlep kelgen siyasiyonlarning biri bolup, teywenni qollashta izchil aktip bolup kelgen. 2024-Yili féwralda u teywendiki resmiy ziyariti jeryanida sey yingwén, ley chingdé qatarliq teywen rehberliri bilen söhbetleshken hemde “Xitayning teywen'ge hujum qilishini tosup qélish üchün amérika hökümiti herbiy jehette teywen'ge yardem bérishi lazim” dep körsetken.

Roytérsning bu heqtiki xewiride éytilishiche, 20-may küni amérika tashqi ishlar ministiri antoni bilinkén ependi ashkara halda teywen pirézidénti ley chingdéning qesem bérip wezipe tapshuruwalghanliqini tebrikligen. Ley chingdé bolsa qesem bérish murasimida xitayning herbiy ighwagerchilikini tenqidligen hemde “Xitay hökümiti teywenning mewjutluqigha yüzlinip, teywen xelqining tallishigha hörmet qilishi, söhbetni toqunushning üstige qoyushi lazim” dégen. Shuningdek teywendiki démokratiyening tehditke duch kelgende jezmen qoghdilidighanliqini bildürgen.