Сабиқ муавин президент майк пәнс: байден 2022-йиллиқ олимпик тәнһәрикәт мусабиқисини бейҗиңдин йөткәшни тәшәббус қилиши керәк

Мухбиримиз ирадә
2021-07-15
Share

Америкиниң сабиқ муавин президенти майк пәнс "2022-йиллиқ бейҗиң қишлиқ олимпик тәнһәрикәт мусабиқиси бейҗиңдин башқа шәһәргә йөткилиши керәк", дегән. У америка президенти җов байденни кишилик һоқуқни еғир дәпсәндә қиливатқан хитай саһибханилиқ қилидиған бу олимпик мусабиқисиға қарши турушқа вә бу тәшәббусқа башламчилиқ қилишқа чақирған.

Майк пәнс бу сөзләрни 14-июл күни америкадики "мирас фонди" да сөзлигән нутқида ейтқан. У мундақ дегән:

"президент байден әгәр хитай һөкүмити корона вирусиниң мәнбәси һәққидә ениқ учур бәрмисә вә уйғурларға қаритиватқан зиянкәшликини дәрһал тохтатмиса, 2022-йиллиқ қишлиқ олимпик тәнһәрикәт мусабиқисини бейҗиңдин йөткәшни очуқ вә кәскин һалда тәләп қилиши керәк".

У йәнә мундақ дегән:

"олимпик пәқәт кишилик һоқуқ вә инсанийәтниң бәхт-саадитигә һөрмәт қилидиған дөләтләрдила елип берилиши керәк".

"дөләт мәҗлиси" намлиқ гезитниң хәвәр қилишичә, униң бу сөзи нәқ мәйдандики аңлиғучиларниң зор алқишиға еришкән. Пәнс алқиш садалири ичидә қилған сөзидә йәнә американиң хитайдики илмий тәтқиқат түрлиригә мәбләғ селишни тохтитиши керәкликини, американиң иқтисадини қоғдаш вә дөләт ичидики тәминләш зәнҗирлирини яхшилаш үчүн америка иқтисадини хитай санаитидин айриветиш тиришчанлиқини тезлитиши керәкликини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт