“Ittipaqliq heptisi” de ottuz qazaq qolgha élin'ghan

Uyghurlar diyaridiki her derijilik hökümet tarmaqliri11-dékabirdin bashlap “Qoshmaq tughqanlishish heptiliki” pa'aliyitini keng omumlashturuwatqan bolup, bu pa'aliyetning mushu ayning axirighiche dawam qilidighanliqi éytilghan idi.

Melum bolushiche, bu pa'aliyette her derijilik hökümet xizmetchiliri küde-körpisini kötürüp yerliktiki kishilerning öylirige bérishi hemde ular bilen yémek-ichmek we yürüsh-turushta birge bolushi telep qilin'ghan. Halbuki, “Ittipaqliq” ni kücheytish meqsitidiki bu pa'aliyet bashlinip héchqanche ötmeyla az dégendimu ottuz qazaqning siyasiy seweb bilen qolgha élin'ghanliqi melum boldi.

Radiyomiz xitay bölümining igilishiche, 16-dékabir küni “Qazaqistanning sowét ittipaqidin ayrilip chiqip musteqil bolghan xatire küni” munasiwiti bilen qazaqlar ündidar arqiliq bir-birige éléktronluq tebrik kartisi ewetken. Shuning bilen ürümchi we köneste ottuz qazaq qolgha élin'ghan. Bularning beziliri “Musteqilliq künige mubarek bolsun!” dégen uchurni yollighanliqi yaki shundaq uchurlargha “Birge bolsun!” dep jawab qayturghanliqi üchünla qolgha élin'ghan. Bu qétimqi qolgha élish weqesidin xewerdar kishiler ehwal tonushturup qolgha élin'ghanlarning asasen yashlar ikenlikini bildürgen hemde ularning isimlirini éytip bergen. Ular bu heqte söz qilip “Qolgha élin'ghandin kéyin ularni nege élip ketkenliki hazirghiche namelum” dégen.

Dunya Uyghur qurultiyining bayanatchisi dilshat rishit bu heqte pikir qilip, hazir Uyghurlar diyaridiki siyasiy kontrolluqning Uyghur we qazaq puqraliridin éship, nöwette memuriy xadimlar we Uyghur saqchilarghimu kéngeygenlikini bildürgen. U bu heqte melumat bérip “Eng addiysi ürümchi sheherlik saqchi idariside ishleydighan Uyghur saqchilar ishxana binasigha kirishte qorallirini tapshurup béridiken.

Saqchi idarisining ichki qismidiki uqturushta éytilishiche, Uyghur saqchilar saqchi idarisige kirip-chiqishta bixeterlik tekshürüshidin ötüshi shert iken. Emma xitay saqchilargha bundaq telep qoyulmaydiken” dégen. Shundaqla “Ittipaqliq”ni teshebbus qiliwatqan xitay hökümitining mushundaq wasitiler arqiliq “Ittipaqliq” ni buzuwatqanliqini alahide tekitligen.