Ши җинпиң хитайдики “милләтләр хизмити йиғини” да “миллий бөлгүнчилик вә диний радикаллиқни түп йилтизидин йоқитиш” ни тәләп қилған

Хитай рәһбири ши җинпиң 27-вә 28-авғуст күнлири хебей өлкисиниң чеңде шәһиридә өткүзүлгән “милләтләр хизмити йиғини” да, уйғурларни бастуруш вә ассимилатсийә қилишни техму күчәйтидиғанлиқиниң сигналини бәргән.

Бу йиғинда у “миллий бөлгүнчилик вә диний радикаллиқни түп йилтизидин йоқитиш” ни, “милләтләр ишлиридики чоң хәвп-хәтәр вә йошурун хәтәрләрниң қәтий алдини елиш” ни тәләп қилған. Хитай һөкүмити хәлқарада уйғурларға ирқий қирғинчилиқ қилиш билән ‍әйиблиниватқан мәзгилдә, өзиниң нөвәттики милләтләр сияситидә аталмиш “терорлуқ вә диний ашқунлиққа қарши туруш” ни күчәйтидиғанлиқини тәләп қилиши диққәт қозғиди.

Хитай “терорлуқ” вә “диний ашқунлуқ” ни баһанә қилип изчил түрдә уйғурларни бастуруп кәлгән. Йеқинда хитай ташқий ишлар министири ваң йи американиң “шәрқий түркистан ислам һәрикити” ни қайтидин “терорлуқ тәшкилатлар тизимлики” гә киргүзүшини тәләп қилған иди.

“җәнубий хитай әтигәнлик почтиси” гезитиниң ашкарлишичә, йиғинда ши җинпиң мундақ дегән: “биз идеологийә асасида чиң турушимиз лазим. (Биз) миллий амилларға алақидар идеологийәлик мәсилиләрни актип вә пухта һәл қилишимиз, миллий бөлгүнчилик, диний ашқунлиқниң зәһәрлик ‍идийәлирини йоқитишни давамлаштурушимиз керәк.”

Униң ейтишичә, “терорлиққа қарши хәлқара һәмкарлиқ күчәйтилип, көп қисим дөләтләр, хәлқара тәшкилатлар, чәт әлләрдики хитайлар вә хитайдин кәлгән аз санлиқ милләтләр билән иш бирлики елип бериш керәк,” икән. У йәнә диққәтни “җоңхуа миллити еңини шәкилләндүрүшкә мәркәзкәлштүрүш” ни тәкитләп, аз санлиқ милләт әзалирини “җоңхуа миллити мәнпәәтини 1-орунға қоюш” қа чақирған.