Shangxeydiki méhmanxanilar “Shinjangliq” xitay qizlarni qobul qilmighan

2-Ayning 24-küni X te élan qilin'ghan bir qisqa widiyoda, özining shinjangliq ikenlikini bildürgen 2 xitay qizi shangxeyde méhmanxanida yétishqa ruxset qilinmighanliqi heqqide shikayet qilghan.

Ularning bildürüshiche, shangxeydiki méhmanxanilar téléfon nomuri we kimliki “Shinjang” din bolghanlarni qobul qilmaydiken. Ular shangxeydiki méhmanxanilarning köchme nopuslarni tizimlaydighan ishi bolsimu maslishidighanliqini bildürgen, emma méhmanxanilar bunimu qobul qilmighan. Ular sürüshtürüsh arqiliq, “Shinjangliq” larning sheher merkizidiki méhmanxanilarda emes, sheher sirtidiki méhmanxanilarda yétishqa ruxset qilinidighanliqini bilgen. Ular yene, shangxeydiki méhmanxanilarning chet elliklerni qobul qilidighanliqini, emma “Shinjangliq” larni qobul qilmaydighanliqini bilgen. Méhmanxana terep bu heqte birer siyaset yaki belgilime barliqinimu démestin, “Shinjangliqlar yétishqa bolmaydu” depla jawab bergen.

Yuqiriqi ehwaldin ghezeplen'gen xitay qizliri: “Biz xitay puqrasi emesmu, shinjang xitayning bir qismi emesmu? biz xitay puqraliri behrimen bolidighan hoquq-menpe'ettin behrimen bolalmaymizmu?” dep qaqshighan.

Köp yillardin béri, ichkiri xitayda Uyghurlargha hem tibetlerge bundaq kemsitish we chetke qéqishning dawamliship kelgenliki melum. Radiyomiz 2016-yil delilligen bir xewerde, xitay sheherliride Uyghurlargha qaritilghan tekshürüshning ashkara milliy kemsitish tüsini alghanliqi, méhmanxanilarningmu Uyghurlarni qobul qilmaydighanliqi melum bolghanidi. Halbuki nöwette, Uyghur élidin barghan xitay puqraliriningmu bundaq chetke qéqishqa uchrighanliqi, ilgiri “Shinjangliq” dep atalghan Uyghurlarning kemsitilish da'irisining Uyghurlardin halqip, xitaylarghimu tesir körsetkenlikini bildürmekte.