Xitayning bir yuqiri derijilik emeldari da'irilerni milliy kemsitish mesiliside agahlandurdi

Muxbirimiz irade
2015-12-22
Share

Tibet aptonom rayonining sabiq partkom sékrétari chyangba punkog xitay hökümitini étnik rayonlardiki milliy kemsitish mesiliside agahlandurghan. Roytérs agéntliqining xewer qilishiche, hazir xitay xelq qurultiyi da'imiy ishlar komitétining mu'awin mudirliq wezipisini ötewatqan chyangba komitétning seyshenbe künidiki ikkinchi omumiy yighinida "Milliy aptonom rayonlarda qanunning emeliylishish ehwali" heqqide doklat bergende qilghan sözide, az sanliq milletlerge qarshi yüz bériwatqan kemsitish mesilisini tilgha alghan.

U mundaq dégen: "Yéqinqi yillardin buyan az sanliq milletler we hetta xitaylar xizmetke orunlishishta kemsitilishke uchrash we bir qisim mulazimetlerge érishelmesliktek ehwallar yüz berdi. Bolupmu qatnash-transport orunlirida, chégra bixeterlik tekshürüsh orunliri we méhmanxanilarda yuqiridiki mesililer körüldi."

Chyangba sözide yene, yuqiriqidek kemsitish ehwallirining eks tesir yaritip, az sanliq milletlerde küchlük jama'et pikri peyda qilghanliqini bildürüp "Milliy aptonomiye qanunlirigha xilap bolghan bundaq heriketler derhal tüzitilishi kérek" dep eskertken.

Uning yuqiridiki bu sözliri xitay hökümitining awazi hésablinidighan shinxu'a agéntliqi teripidinmu élan qilin'ghan.

Roytérs agéntliqi bolsa xewiride, xelq'ara kishilik hoquq organlirining milliy kemsitish qilmishliri, bolupmu Uyghur élide éghir dep qaraydighanliqini, emma xitay hökümitining buni ret qilidighanliqini bayan qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet