Хитайларниң моңғул тилини чәклиши кәскин тәнқидләнди

Мухбиримиз әзиз
2020-08-31
Елхәт
Пикир
Share
Принт

Хитай һөкүмитиниң 2020-йили сентәбир ейидин башлап ички моңғул аптоном районидики башланғуч вә оттура мәктәпләрдә тил-әдәбият, сиясәт вә тарих дәрслиридә моңғул тилини пүтүнләй бикар қилиш һәмдә бу дәрсләрни хитайчә тилда өтүш қарари чәтәлләрдики моңғул җамаитниниң кәскин тәнқидигә дуч кәлди.

«Нйо йорк вақти» гезитиниң 31-авғусттики хәвиридә ейтилишичә, бу қарарға наразилиқ билдүрүш үчүн нйо йорктики «җәнубий моңғулийә кишилик һоқуқ мәркизи» наразилиқ намайиши өткүзгән. Намайишта улар «бизниң ана тилимиз моңғул тили!», «бизниң моңғул тилидин башқа кимликимиз йоқ!» дегәндәк шоарларни товлиған. Мәзкур тәшкилатниң рәиси енгебату тогочог бу һәқтә сөз қилип «биз сиясий җәһәттики барлиқ аптономийә һәқлиримизни йоқаттуқ. Әмди бизниң тилдин башқа немимиз қалди?» дегән.

Хитай һөкүмити буниңдин илгири уйғурлар дияридики барлиқ башланғуч, оттура вә алий мәктәпләрдә уйғур тилидики дәрсләрни әмәлдин қалдуруп, уларниң орниға хитайчә дәрсләрни сәплигәниди. Әмма хитай һөкүмити һазирғичә «биз қош тиллиқ оқутушни иҗра қиливатимиз» дәп келиватқан болуп, уйғур оқуғучиларға хитайниң қәдимки замандики коңзичә дәстурлирини ядлаш, коңзичә вә қәдими хитай услубида кийинишни қолланғаниди. Шу сәвәбтинму бәзи анализчилар бу һални «хитай һөкүмитиниң ашкара һалда уйғур тилини чәклиишидин башқа нәрсә әмәс» дәп тәнқидлигәниди. Әмдиликтә бу һалниң ички моңғул аптоном районида көрүлүши хитай һөкүмитиниң бу тәдбирлириниң маһийитини техиму ашкарилиди.

Пикирләр (0)
Share
Толуқ бәт