Ma shingruy “Shinjangning tereqqiyati we muqimliqigha tesir yetküzidighan qiyin mesililerni hel qilishning ünümlük yollirini izdesh” ni telep qilghan

Uyghur aptonom rayonluq partkom xitay kompartiyesining 15-iyuldin 18-iyulghiche béyjingda ötküzülgen 20-nöwetlik 3-omumiy yighini axirlisha-axirlashmayla bu yighinning qararlirini ijra qilishni bashliwetken.

Xitay taratqulirining xewer qilishiche, 3-omumiy yighin axirliship etisila, yeni 19-iyul küni Uyghur aptonom rayonluq partkom yighin chaqirip, 3-omumiy yighinning qararlirini ijra qilish heqqide orunlashturush élip barghan. Yighinda shinjangning yuqiri süpetlik tereqqiyati we uzun muddetlik tinchliq we muqimliqqa tesir yetküzidighan qiyin mesililerni hel qilishning ünümlük yollirini dawamliq izdesh telep qilin'ghan.

“Shinjang géziti” ning 19-iyul bergen xewiride, yighin 3-omumi yighinning rohini öginish we emeliyleshtürüshni “Shi jinpingning shinjang xizmiti söhbet yighinida qilghan muhim sözi we muhim yolyoruqining rohiy, partiyening yéngi dewrdiki shinjangni bashqurush istratégiyesini qet'iy we toluq ijra qilish bilen birleshtürüsh” telep qilin'ghanliqi qeyt qilinmaqta.

Xewerde, mezkur yighin Uyghur élide 3-omumiy yighinning rohini öginishning keng teshwiqat seperwerlik herikiti élip bérishni telep qilghanliqini bildürgen bolsimu, emma  qaysi sahelerde, qandaq konkrét orunlashturushlarni élip barghanliqi tilgha élinmighan. Béyjing jingshi méhmanxanisida ötküzülgen 3-omumiy yighinning axbaratida, téxnologiye tereqqiyati, ijtima'iy parawanliqni yaxshilash, xamchot, baj, maliye sistémisi islahatini chongqurlashturush qatarliq mesililer otturigha qoyulghan bolsimu, emma xitayning istémal we öy-mülük baziridiki kasatchiliq, yerlik hökümetlerning qerz kirizisi qatarliq halqiliq iqtisadiy mesililerni qandaq hel qilidighanliqi heqqide tepsiliy melumat bérilmigen.

“Shinjang géziti” ning bildürüshiche, Uyghur aptonom rayonluq partkomning sékrétari ma shingruyning riyasetchilikide ötküzülgen yighinda, “Shinjangning yuqiri süpetlik tereqqiyati we uzun muddetlik tinchliq we muqimliqqa tesir yetküzidighan qiyin mesililerni hel qilishning ünümlük yollirini dawamliq izdinish”telep qilin'ghan.