1 - Номурлуқ музлуқ йәнә 50 йилда пүтүнләй ерип түгәп кетиши мумкин

Тәңритағ тизмисиға җайлашқан биринчи номурлуқ музлуқниң ериш қәдими тезләшкәнлики, униң йәнә 50 йилда пүтүнләй ерип түгәп кетиши мумкинлики илгири сүрүлмәктә.

Хитай хәлқ торида бу һәқтә берилгән хәвәрдә көрситишичә, хитай пәнләр академийәси тәңритағ музлуқини көзитиш - тәкшүрүш понкитиниң башлиқи ли җоңчин мәзкур музлуқниң өткән бир йилда 13 йерим метир еригәнлики, әгәр мушу сүрәт бойичә болғанда буниң 50 йилдин кейин пүтүнләй йоқап кетиш хәтиригә дуч келидиғанлиқини ейтқан.

Хәвәргә қариғанда, 2016 - апрелдин, 2017 - йили апрелғичә болған арилиқтики тәкшүрүш нәтиҗисигә қариғанда, музлуқниң шәрқий вә ғәрбий қирлири көрүнәрлик қисқарған, җәмий қисқириш қелинлиқи 13 йерим метир болған.

Деңиз йүздин тәхминән 4 миң метир игиликкә җайлашқан 1 - номурлуқ музлуқ үрүмчиниң асаслиқ су мәнбәлиридин бири икән. Илгири, бу музлуқниң өткән 40 йил мабәйнидә 140 метир непизлигәнлики, әтрапидики музлуқ көлимиму көрүнәрлик дәриҗидә азайғанлиқи көрситилгән.

Тәңритар музлулирида көрүлуватқан бу ериш һадисиси һәққидә тохталған мутәхәссисләр илгири радиомизға музлуқларниң еришигә дуня характерлик килимат өзгиришидин башқа, адәмләрниңму сәвәб болғанлиқини билдүрүшкән.

Ли җоңчин тәңритағ муһитиниң җиддий қоғдилиши вә музлуқларниң еришиниң алди елиниши лазимлиқини, әгәр шундақ болғанда музлуқларниң ериш қәдимини астилатқили болидиғанлиқини билдүргән.