Нәнсий пелосиниң зияритидин аччиқланған хитай тәйвән әтрапида һәрбий маневир башливәткән

Америка авам палата рәиси нәнсий пелоси тәйвәндики зияритини аяғлаштуруп бир күндин кейин хитай тәйвәнгә йеқин деңиз районлирида һәрбий маневирини башливәткән.

С н н телевизийәсиниң хәвиридин қариғанда, хитай бу һәрбий маневирида тәйвәнниң шимали, җәнуби вә шәрқидә кәм дегәндә 11 башқурулидиған бомба атқан болуп, бу бомбиларниң 5 даниси японийәгә тәвә деңиз районлириға чүшкән. Бирақ, хитай армийәси “башқурулидиған бомбиларниң һәммиси нишанға дәл зәрбә бәрди” дәп җакарлиған.

Японийә тәрәп хитай һөкүмитигә наразилиқ билдүргән болуп, японийәниң дөләт мудапиә министири нобуо киши сөзидә “бу бизниң дөләт бихәтәрликимиз вә пуқралиримизниң бихәтәрликигә мунасивәтлик еғир мәсилә” дегән.

Һалбуки хәвәрдә ейтилишичә, хитай ташқи ишлар баянатчиси хуа чүнйиң маневирдин бир күн бурун йәни 3-авғуст чаршәнбә күнидики қилған сөзидә бейҗиңниң у деңиз районини японийәгә тәвә дәп етирап қилмайдиғанлиқини ейтқан икән.

Тәйвән президенти сәй йиңвен болса 4-авғуст, пәйшәнбә күни кәчтә син арқилиқ нутуқ сөзлигәндә хитайниң һәрбий маневирини “тәйвән үчүнла әмәс, хәлқара җәмийәт үчүнму бир мәсулийәтсизлик” дәп атиған.

Президент сәй йиңвен ханим баянатида мундақ дегән: “хитай бүгүн тәйвән әтрапидики районларда һәрбий маневир қиливатиду. Биз бейҗиңни әқил билән һәрикәт қилишқа вә өзини тутувелишқа чақиримиз. Тәйвән тоқунушни кәскинләштүрмәйду, әмма биз игилик һоқуқимизни, бихәтәрликимизни вә демократийәмизни қәтий қоғдаймиз”.

С н н телевизийәсиниң хәвиридә ейтилишичә, гәрчә һазирчә бу маневирниң бир һәрбий тоқунушқа айлинип кетиш еһтималлиқи интайин аз болсиму, әмма вәзийәтниң қаш билән кирпик арисида өзгириш мумкинчилики бар икән.