Shimaliy atlantik ehdi teshkilati bash katipi: “Ukra'inaning NATO gha eza bolushi basquchi addilashturlidu!”

Shimaliy atlantik ehdi teshkilati (NATO)ning bash katipi jéns stolténbérg (Jens Stoltenberg) 11-iyul küni litwa paytexti wilnusta bashlan'ghan NATO gha eza döletler bashliqlar yighinida axbarat élan qilip, ukra'inaning NATO eza bolush basquchi qisqartilidighanliqini élan qilghan. Bu 2022-yili 2-ayda ukra'inagha qoralliq tajawuz qilghan rusiye üchün, shundaqla rusiyening qoralliq hujumini eyipleshni ret qilip, uni astirttin qollighan xitay üchün küchlük signal, dep qaralmaqta. NATO Ning bu yéngi qarari türkiye uzundin béri tirejep kelgen shiwétsiyening NATO eza bolushini ret qilish qararidin waz kéchishige ulapla élan qilindi.

Jéns stolténbérg 10-iyul muxbrlargha türkiye prézidénti erdoghanning shiwétsiyening NATO gha eza bolushini qobul qilghanliqi, bu qararni téz arida türkiye parlaméntining testiqlishigha sunidighanliqini bildürgen. Jéns stolténbérgning éytishiche, erdoghan shwétsiyening NATO gha kirishi toghrisida “Éniq wede” bergen. Chet'el taratqulirining xewerliride, amérika türkiyege F-16 tipliq urush ayrupilani sétip bérishke qoshulghandin kéyin, shundaqla shwétsiye türkiyege qaritilghan qoral-yaraq imbargosini bikar qilishqa, türkiye puqralirining shen'gen (Schengen) döletliride erkin sayahet qilishini qollashqa wede qilghandin kéyin türkiyening qararini özgertkenliki tekitlenmekte.

Jéns stolténbérg 11-iyul élan qilghan axbaratida, ukra'inaning NATO gha eza bolushi ikki basquchluq jeryandin bir basquchluq jeryan'gha qisqartilghanliqini bildürüp, “Bu ukra'ina üchün intayin küchlük pilan, shundaqla uning NATO eza bolush musapisidiki éniq yol” digen. Jéns stolténbérg ukra'ina prézidénti zéléniskiy ukra'inaning ezaliqigha bir waqit jedwilining békitilmeslikini “Misli körülüp baqmighan hadise we quruq gep” dep körsetkendin kéyin bu qararni élan qilghan. Lékin jéns stolténbérg “Ukra'ina shert-shara'it pshship yitilgende we ‍ittipaqdash döletler qoshulghanda NATO gha eza bolushqa resmi teklip qilinidu” dep körsetken.