Ню-йорк шәһириниң башлиқи “хитайға сетилғанлиқ” билән әйибләнди

“ню-йорк почтиси” гезитиниң 25-июндики тәпсилий хәвиридә ейтилишичә, америка федератсийә тәкшүрүш идариси (FBI) ню-йорк шәһириниң башлиқи ерик адамс (Eric Adams) вә униң әң муһим ярдәмчисиниң өйлирини ахтурған. Хәвәрдә ейтилишичә, бу қетимқи өй тинтишниң мәқсити уларниң хитай сәпиригә даир мәлуматларни топлаш икән.

Хәвәрдә ейтилишичә, ерик адамсниң баш мәслиһәтчиси болған винни греко (Winnie Greco) исимлик хитай ню-йорк шәһиридики бир хитай ширкити намидин шәһәр башлиқиниң сайлам паалийити үчүн ианә топлиған. Бу хилдики ианә паалийәтлиригә пул һәдийә қилидиғанлар хитай содигәрлири болуп, бу һал өз нөвитидә америка тәвәсидики сайлам паалийәтлиригә арилашқанлиқ, дәп қаралған. Йәнә келип адамс һазирға қәдәр йәттә қетим хитайға зиярәткә барған болуп, аз дегәндиму униң ахирқи хитай сәпиригә керәклик бир қисим хираҗәтни хитай һөкүмити үстигә алған. У шу қетимлиқ зиярәттин қайтип кәлгәндин кейин, “биз хитай һөкүмити билән бәк яхши сөһбәтләштуқ” дегән.

Бу йил 61 яшқа киргән винни греко өзини охшимиған сорунларда “вәтәнпәрвәр хитай муһаҗири” дәп тонуштуруп кәлгән болуп, йиллардин буян хитай компартийәси арқа тирәк болуватқан көплигән тәшкилатларға “мәслиһәтчи” болған икән. Гәрчә улар һазирчә қолға елинмиған болсиму, әмма бу һәқтики тәкшүрүшләр җиддий давам қилмақта икән.

Мәлум болушичә, мексика арқилиқ америка чеграсидин қанунсиз өткән хитай көчмәнлириниң көп қисми удул ню-йорк шәһиригә йоллап берилгән болуп, уларниң сиясий панаһлиқ илтимасиниң тезла тәстиқлиниши һәмдә бир қатар параванлиқларға наил болуши, көплигән ню-йорк аһалисини нарази қилған. Нөвәттә бу ишларниң адамс билән қанчилик мунасивити барлиқи техи ениқ әмәс икән.