Абдулһәким идрисниң очуқ хети уйғур җәмийити дуч келиватқан паҗиәни қайта әскәртти

Мухбиримиз әзиз
2020-04-28
Елхәт
Пикир
Share
Принт

Муһаҗирәттики уйғурларға ортақ болған, шундақла уйғур мойсипитлириға 1962-йилидики зор қач-қач вәқәсидин кейин чәтәлдики уруқ-туғқанлири билән болған барлиқ алақисиниң кесип ташланғанлиқидәк реаллиқни әслитидиған нөвәттики җудалиқ муһаҗирәттә яшаватқан уйғур җамаитини түрлүк шәкилләр арқилиқ бу зулумларни паш қилишқа үндимәктә.

Америкадики уйғур паалийәтчи абдулһәким идрисниң «анамға мәктуп» намида елан қилған очуқ хети бу җәһәттики йәнә бир үлгилик әмгәк сүпитидә 28-апрел күни «зимистан» торида елан қилинди. Мәктупта абдулһәким идрис муһаҗирәттики миңлиған уйғурға охшаш 21-әсирдәк илим-пәнниң әң тәрәққий қилған мәзгилидә яшаватқан уйғурларниң уруқ-туғқанлири билән телефонда сөзлишиштәк әқәллий һәқлириниңму йоқлуқини йип учи қилған һалда уйғур дияридики зулумларни бирнәччә тәрәптин көрситип бәрди.

Болупму мәзкур очуқ хәттә абдулһәким идрис хитай һакимийитиниң уйғур дияриға қәдәм қойған күндин етибарән уйғурларни маддий вә мәниви җәһәттин хараб қилиш пиланини иҗра қиливатқанлиқи, хитайниң зулум вә бастурушлириниң аллиқачан бир түркүм уйғурни өз вәтинидә туралмастин чәтәлләргә чиқип кетишкә мәҗбур қилғанлиқи, хитай һакимийитиниң һечйәрни ала қоймай қаплиған зулум ториниң әмдиликтә миңлиған уйғур аилилири үчүн «муқәддәс кичик вәтән» дәп тәриплиниватқан аилә бошлуқиғичә йейиливатқанлиқини өзиниң шәхсий кәчмишлири асасида баян қилип бериду.

Мәзкур очуқ хәттә йәнә нөвәттә уйғурларниң мәнивийәт дунясидики ғоллуқ чүшәнчиләрдин болған «вәтәнгә болған ашиқлиқ» һәмдә «вәтәндин ибарәт бу мәшуқ үчүн җандин кечиш» ниң пәйти келиватқанлиқиниму көрситип өтиду.

Абдулһәким ташқи дунядики демократик чоң муһитта туруватқан уйғурларниң һазир йүз бериватқан паҗиәләрни дуняға аңлитиштәк мәҗбурийитиниң муһаҗирәт һаятида улар қилалайдиған әң чоң хизмәтләрниң бири икәнликини тәкитләйду. Шундақла өзи вә аяли рошән аббасниң дуня уйғур қурултийи тәркибидә уйғур дияридики зор тутқун, мәҗбурий әмгәк, бир ғерич йәрни ала қоймай һәммә наһийә-шәһәрләрни қаплиған лагерлар, пүткүл уйғур дияриниң үсти очуқ түрмигә айланғанлиқидәк реаллиқни ташқи дуняға аңлитиш үчүн муһакимә йиғинлири вә намайишлардин толуқ пайдиланғанлиқини, әмма буниң һәрқачан хитай һөкүмитиниң номуссиз шәкилдә өч елишиға сәвәб болуп, вәтәндики уруқ-туғқанлириниң он-йигирмиләп қамаққа вә лагерға мәһкум болғанлиқиниму баян қилиду. Әмма абдулһәким анисиға охшаш миңлиған уйғур анилириниң «балилиримиз вәтәндин ибарәт бу чоң өйни қоғдисун» дегәнни арзу қилидиғанлиқини алаһидә тәкитләш арқилиқ өзлириниң буниң билән тохтап қалмайдиғанлиқиниму алаһидә тәкитләйду.

Аптор ахирида уйғур дияридики зулумдин чачлири ақарған миңлиған аниларниң қан-яшлиқ дуалириға арилишип кәткән хилвәттики тиләклириниң җәзмән иҗабәт болидиғанлиқини, чүнки һәқниң һәрқачан батил үстидин ғәлибә қилидиғанлиқини әслитип өтүп: «бизму чоқум көрүшимиз, җеним ана. я бу дуняда, я у дуняда!» дәп хитаб қилиду.

Пикирләр (0)
Share
Толуқ бәт