Һәрқайси пуқравий тәшкилатлар явропа иттипақиға бейҗиң олимпик мусабиқиси һәққидә бирләшмә мәктуп йоллиди

Хитай саһибханлиқ қилмақчи болуватқан бейҗиң қишлиқ олимпик мусабиқиси йеқинлаватқанда 250 тин көпрәк пуқравий тәшкилатлар бирләшмә мәктуп тәйярлап, явропа иттипақиға йоллиди һәмдә уларниң бейҗиң олимпик мусабиқисини дипломатик байқут қилишини тәләп қилди. Дуня уйғур қурултийиниң тор бетидә елан қилинған мәзкур очуқ мәктупни уйғурлар, тибәтләр, хитайлар, моңғуллар вә тәйвәнликләрниң муһаҗирәттики тәшкилатлири тәйярлап чиққан болуп, явропа иттипақиниң үч йилда бир ечилидиған башлиқлар йиғини һарписида уларға тапшурулған.

Мәзкур очуқ мәктупта 9-декабир күни мустәқил характердики “уйғур сот коллегийәси” ниң “хитай һөкүмити нөвәттә ғәрәзлик һалда системилиқ шәкил алған ирқий қирғинчилиқни иҗра қиливатиду” дегән мәзмунда сот һөкүми чиқарғанлиқи алаһидә әскәртилгән. Шуниңдәк “мушундақ қирғинчилиқ вә инсанийәткә қарши җинайәт садир қиливатқан бир дөләтниң олимпик мусабиқисини дипломатик байқут қилмаслиқ һәмдә униңға қатнишиш маһийәттә ашу қирғинчилиқ вә зулумға шерик болғанлиққа баравәр,” дәп көрситилгән.

Очуқ мәктупта йәнә бир милйон тибәт өсмүрниң хитай һөкүмити тәсис қилған ятақлиқ мәктәпләргә йиғивелинғанлиқи, хоңкоңдики демократийә намайишлириға иштирак қилған паалийәтчиләрниң қамаққа һөкүм қилиниши қатарлиқ әһвалларму алаһидә тилға елинған. Шуниңдәк америка, әнглийә, канада, австралийә қатарлиқ әлләрниң олимпик мусабиқисини дипломатик байқут қилғанлиқи, бундақ әһвалда явропа ттипақиниң бу мусабиқини бирләшмә шәкилдә дипломатик байқут қилиши, “тарихниң тоғра тәрипини таллаш болидиғанлиқи” алаһидә тәкитлингән.

Мәлум болушичә, бу мәктупқа долқун әйса, бучуң серең, тең бяв, рошән аббас, енгебату тогочог, өмәр қанат қатарлиқ кишиләр явропа, америка, австралийә қатарлиқ җайлардики 250 тин артуқ пуқравий тәшкилатқа вакалитән имза қойған.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар