Өзбекистан малийә саһәсидә чоң тазилаш елип берилған

Мухбиримиз үмидвар
2018-01-01
Share

Өзбекистанда мәрһум президент ислам кәримоф дәвридики бир қисим әмәлдарлар арқиму-арқидин вәзиписидин қалдурулуп, уларниң орниға йеңи рәһбәрләр қоюлуватқанлиқи мәлум болмақта.

Президент шавкәт мирзийойеф буйруқи бойичә өткән һәптә өзбекистанниң пул-муамилә вә иқтисади вәзийити билән биваситә мунасивәтлик орган-малийә министирлиқидики бир қисим кона әмәлдарни өз ичигә алған 562 адәм бирақла иштин һәйдәлгән.

Пәрғанә хәвәр агентлиқиниң өзбекистан мәнбәлиридин нәқил елишичә, 22-декабир күни өзбекистан малийә министирлиқиға кадирларни тазилаш буйруқи келип, әтисила иштин бошитиш башлинип, министирлиқ тәркибидики икки асасий башлиқ вә муавин башлиқлар болуп, 24 әмәлдар иштин бошитилған. Малийә министирлиқиниң һәр қайси вилайәтлиридики тармақ органлиридики әмәлдарлар, кадирлар болуп, хизмитидин һәйдәлгәнләр 562 адәмгә йәткән. 

Президент мирзийойеф униң алдида қилған сөзидә “биз 20 йилдин артуқ вақит малийә министирлиқидики ‛әқиллиқ кишиләр‚ сәвәбидин хәлққә натоғра мәлумат бәрдуқ” дегән вә әмди идарә рәһбәрлик ишлирида “яшлар, қайси милләт болушидин қәтийнәзәр вәтәнни сойидиған кишиләр болуши керәклики” ни тәкитлигән иди. 

Өзбекистан малийә министирлиқини 2005-2016-йиллири, президент кәримофниң ишәнчлик адәмлиридин рустәм әзимоф башқурған болуп, у кәримоф өлгәндин кейин президентлиқ орнини талашқан асасий кишиләрниң бири дәп қаралған иди, әмма у сайламға қатнашмиған. У, 2016-йили, декабирда вәзиписидин қалдурулуп, муавин баш министирлиқ вәзиписигә қоюлуп, 2017-йили буниңдинму бошитиветилгән иди.

Пәрғанә агентлиқиниң өзбекистанниң “газета.Уз” учур торидин нәқил елишичә, президент мирзийойеф йәнә өзбекистан дөләт бихәтәрлик идарисиниму ислаһ қилидиғанлиқини билдүргән. Мәзкур идарә президент ислам кәримоф дәвридики әмәлдарлар тәрипидин башқурулуватқан болуп, хәлқара көзәткүчиләр илгири, өзбекистандики кишилик һоқуққа дәхли-тәруз қилидиған түзүмидә мәзкур органниң қоли барлиқини әйиблигән иди. 

Анализчилар шавкәт мирзийойеф һакимийәтни қолға алған икки йилдин буян президент ислам кәримофниң 26 йиллиқ һөкүмранлиқи дәвридә чириклик, мустәбитлик күчәйгән вә иқтисади җәһәттин арқида қалған өзбекистанниң қошна қазақистан, қирғизистан, түркийә қатарлиқ түркий җумһурийәтләр билән болған қериндашлиқ мунасивәтлирини әслигә кәлтүрүш, русийә, хитай вә ғәрб әллири билән болған сода-иқтисадий алақилирини күчәйтип, өзбекистанниң иқтисади җәһәттин раваҗлинишини қолға кәлтүрүш үчүн бир қатар паалийәтләрни елип бериватқанлиқини билдүрүшмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт