Pakistanning xitaydiki elchisining "Bingtu'enning shinjang tereqqiyatidiki roli" ni maxtishi diqqet qozghidi

Muxbirimiz erkin
2020-11-09
Share

Pakistanning xitaydiki bash elchisi mo'in ul heqning 6-noyabir "Shinjang ishlepchiqirish-qurulush bingtu'enni" chaqirghan shangxeydiki bir yighinda söz qilip, xitayning Uyghur élidiki mezkur yérim ishlepchiqirish-yérim qoralliq teshkilatini maxtighan. Bu tunji qétim bir chet'el emeldarining amérika hökümiti teripidin Uyghurlarni basturushta oynighan roli seweblik émbargo qoyulghan bu organni maxtishidur. Amérika hökümiti bu yil 7-ayda bingtu'en we uning ikki rehbirige Uyghurlarni depsende qilghanliqi üchün émbargo yürgüzgenidi.

Xitaydiki "Junggo géziti" ning xewer qilishiche, mo'in ul heq "Meblegh we soda hemkarliq munbiri" namliq bu yighinda pakistanning "Shinjang xelqi we hökümitining namratliqtin qutquzush we radikaliqqa qarshi turush heriketliridin xewerdar" ikenlikini bildürgen. Mo'in ul heq bu sözlerni pakistanning karton weqeside firansiyege shiddetlik qarshi turup, xitayning milyonlighan musulmanning lagérlargha qamishi, diniy étiqadini ret qilishini "Radikalliqqa qarshi turush" dep qollishi "Ikki yüzlimichilik" dep eyibliniwatqan mezgilde qilghan.

Musulman döletliri Uyghurlar mesiliside xitayni qollighan yaki uninggha süküt qilip kelgen bolsimu, lékin xitayning herikiti gherb döletlirining qattiq tenqidige uchrap keldi. Shwétsariye hökümitining ashkarilishiche, shwétsariye dölet ishlar sékrétari kristina marti 9-noyabir xitayning mu'awin tashqi ishlar ministiri chin gang bilen tor yighini ötküzgen. Yighinda kristina marti Uyghur we tibetlerning insan heqlirige xilapliq qiliniwatqanliqini tekitlep, özlirining endishe qiliwatqanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet