Panama xitay bilen bolghan achquchluq qanal toxtamini axirlashturidighanliqi toghrisida wede bergen

Amérika xewer taratqulirigha asaslan'ghanda, amérika tashqi ishlar ministiri marko rubiyoning ziyariti netijiside panama xitay bilen bolghan achquchluq qanal toxtamini axirlashturidighanliqi we amérika bilen hemkarlishidighanliqi toghrisida wede bergen.

 “Fokés xewerliri” (FOX News) ge asaslan'ghanda, yekshenbe küni amérika tashqi ishlar ministiri marko rubiyo (Marco Rubio) panama pirézidénti josé ra'ul mulino (José Raúl Mulino) bilen körüshkende, pirézidént donald trampning panamaning halqiliq toshush qanilining kontrol qilish hoquqini xitaygha bergenliki toghrisidiki eyiblishini yetküzgen. Panama pirézidénti josé ra'ul mulino xitay bilen bolghan muhim tereqqiyat we hemkarliq kélishimini axirlashturidighanliqi toghrisida wede bergen.

Amérika tashqi ishlar ministirliqi bayanatchisi tammi brusi bu heqte bayanat bérip mundaq dégen: “Mako rubiyo trampning uchurini panama pirézidénti josé ra'ul mulinogha yetküzüp, xitayning xongkongdiki shirket arqiliq qanalning kirish éghizigha yéqin ikki portni bashqurup su yoligha tehdit qiliwatqanliqini, shuning bilen bir waqitta buning amérika-panama shertnamisige xilap ikenlikini bildürdi”.

Panama pirézidénti josé ra'ul mulino marko rubiyo bilen körüshkendin kéyin muxbirlargha mundaq dégen: “Méningche marko rubiyoning bu ziyariti panama we amérikaning yéqin munasiwet ornitishigha yéngi pursetler élip kélidu. Hemde amérikaning panamagha salghan meblighini imkanqeder ashurushigha türtke bolidu. Biz, xitay bilen bolghan qanal toxtamini mumkin qeder baldur axirlashturushqa tirishimiz”.

 Amérika tashqi ishlar ministirliqining mölcherlishiche, panama qanilidin ötidighan barliq paraxotlarning texminen %72 i amérika portliridin kélidiken yaki amérika portlirigha baridiken.