Хитай уйғур дияридики пахта тоқумичилиқ саһәсидә юқири техника қоллинип, ғәрб дунясиниң ембаргоси үстидин ғалип кәлгәнликини давраң салған

Вашингтондин мухбиримиз уйғар тәйярлиди
2024.04.30

Хитай тәтқиқатчилири 5G вә сүний әқил техникисиниң уйғур дияридики тоқумичилиқ санаитидә кәң көләмдә ишлитилип, експортта рекорт яритишқа ярдәм қилғанлиқини илгири сүргән.

“җәнубий хитай әтигәнлик почтиси” ниң 29-апрелдики хәвиригә қариғанда, хитай тәтқиқатчилири 5G вә сүний әқил техникисиниң уйғур дияриниң тоқумичилиқ санаитини қандақ өзгәрткәнлики, ташқий експортта қандақ рекорт яратқанлиқини тәпсилий баян қилған бир доклат елан қилған. Доклатта, юқири техниканиң уйғур дияридики пахта вә тоқумичилиқ санаитидә кәң көләмдә ишлитилип, америка башчилиқидики ғәрб әллириниң кишилик һоқуқ мәсилисидә хитайға қойған җаза тәдбирлири үстидин ғалиб келишкә ярдәм қилғанлиқи қәйт қилинған.

Мәзкур доклатта мундақ дейилгән: “американиң хитайға қарши йүргүзгән бир йүрүш җаза тәдбирлиригә қаримай, шинҗаң тоқумичилиқ завути ишләткән юқири техникадики ‛инқилабий бурулуш‚ ташқий експортта рекорт яритишқа ярдәм қилди. Енергийә тәннәрхиниң төвәнлиши вә мәһсулат сүпитиниң өсүши, кишилик һоқуқ мәсилисигә қоюлған җаза үстидин ғалиб кәлди”.

Хитай таможна мәнбәлиридә көрситилишичә, уйғур диярниң тоқумичилиқ експорти өткән йили 108 милярд йүән (14 милярд 800 милйон доллар) ға йәткән, йип вә башқа хам әшяларниң ишләпчиқириш миқдари 74 пирсәнт, кийим-кечәк ишләпчиқириш миқдари 30 пирсәнт өрлигән. Мәлум болушичә, уйғур дияри хитайдики пахта ишләпчиқиришиниң 90 пирсәнттин көпрәкини игиләйдикән.

Һалбуки, хитай юқири техникани қоллинип пахта мәһсулатлириниң екиспортини йәниму ашурғанлиқини илгири сүрсиму, әмма америка башчилиқидики ғәрб дунясиниң хитайға қойған җаза тәдбирлириниң хитай иқтисадини хели дәриҗидә һалсиратқанлиқи мәлум. Хитай ташқи ишлар министири ваң йиму мюнхен хәвпсизлик йиғинида, уйғурлар учраватқан мәҗбурий әмгәк мәсилисини рәт қилип, ғәрбниң хитайға қойған җаза вә ембарголирини бикар қилишни тәләп қилған иди.

“коммунизм қурбанлири хатирә фонди” ниң алий тәтқиқатчиси адриян зенз йеқинда елан қилған доклатида хитайниң уйғур диярида мәҗбурий әмгәк сияситини техиму кәң даиридә йүргүзүлүватқанлиқини, буниң 2025-йилғичә давамлишидиғанлиқини дәлил-пакитлири билән оттуриға қойған иди.

Америка әмгәк министирлиқи “шинҗаң тоқумичилиқ санаитидә йүз миңлиған ишчи мәҗбурий әмгәккә тутулған болуши мумкин” ликини оттуриға қойған иди. Игилинишичә, америка дөләт мәҗлисиниң әзалири хитайниң даңлиқ мода кийим-кечәк ширкәтлиригә қарита йеңи бир җаза йүргүзүшни ойлишиватқанлиқи мәлум.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.