Путин билән әрдоған ортақ ахбарат йиғини өткүзүп, түрк-рос мунасивәтлирини күчәйтидиғанлиқини билдүрди

Мухбиримиз әркин
2016-10-10
Share

Русийә президенти путин билән түркийә президенти әрдоған дүшәнбә күни истанбулда көрүшүп, икки дөләт мунасивитини тез нормал йолға селишниң бәзи қәдәмлирини атқан. Әрдоған билән путин истанбул йилтиз сарийида бир саәт 40 минут көрүшкән.

Икки әл рәһбири шу күни "түрк еқими" намлиқ рус-түрк тәбиий газ туруба йоли қурулушиниң имза қоюш мурасимиға қатнашқан һәм мухбирларни күтүвелиш йиғини чақирған. Мухбирларни күтүвелиш йиғинида әрдоған, "түркийә-русийә мунасивәтлиридики нормаллишиш тез давамлишишиға ишинимән. Мунасивитимизни буниңдин кейинки җәрянда техиму көп саһәләр бойичә раваҗландуримиз" дегән.

У русийә рәһбири билән сүрийә мәсилиси, түркийәниң сүрийәдики фират қалқини һәрбий һәрикити қатарлиқ мәсилиләрни сөзләшкәнликини билдүргән. Русийә президенти путин, әрдоған билән сүрийәниң һәләп шәһиригә инсанпәрвәрлик ярдәм буюмлирини йәткүзүшниң муһимлиқида ортақ пикир һасил қилғанлиқини билдүрүп, " әмма ярдәм буюмлирини йәткүзүштики бирдин- бир тосқунлуқ қатнаш бихәтәрлики" икәнликини илгири сүргән.

Бу русийә президентиниң өткән йили 11‏-айда түркийә бир русийә уруш айропиланини етип чүшүрүветип, икки дөләт мунасивити бузулуп кәткәндин бери тунҗи қетим түркийәни зиярәт қилишидур. Русийә-түркийә мунасивити бу йил 15‏-июл түркийәдә һәрбий өзгириш йүз бериштин сәл бурун еришқа башлиған иди.

Президент путин истанбулда өткүзүлгән дуня енергийә йиғиниға қатнишиш үчүн кәлгән. Лекин униң түркийәни зиярәт қилған вақти русийә-америка мунасивити сүрийә мәсилиси сәвәблик начарлишип кәткән мәзгилгә тоғра келип қалди.

Америка йеқинда русийә билән сүрийә һөкүмитини һәләп шәһиридә бигунаһ пуқраларни бомбардиман қилип, уруш җинайити садир қилиш билән әйиблигән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт