Xotendiki qashtéshi oymichiliqi kespiy mektepliri diqqet qozghidi

Xitay xewerler torining 31-öktebir küni tarqatqan bir xewiride, xoten wilayitide élip bérilghan qashtéshi oymisi musabiqisige qatnashturulghan eserlerning xotendiki 3 kespiy terbiyelesh merkizidiki oqughuchilar teripidin layihelen'genliki bayan qilinishi diqqet qozghidi.

Xewerde déyilishiche, xoten qashtéshi xam matériyal qilip yasap chiqilghan bu eserlerni xoten nahiyelik qashtéshi kespiy téxnika instituti, qaraqurum kespiy mektipi we xoten qashtéshi oymichiliq kespiy terbiyelesh orni oqughuchiliri yasighaniken. Xewerde, bu mekteplerning biri bolghan xoten nahiyelik qashtéshi ottura kespiy téxnika institutining zibu-zinnet pishshiqlap ishlesh we ishlepchiqirish kespi tijariti qiliwatqanliqigha yette yil bolghanliqi tilgha élin'ghan.

Xoten wilayiti xitay hökümitining “Kespiy maharet bilen terbiyelesh” we “Ishik aldida ishqa orunlishish” namidiki mejburiy emgek türliri eng köp yolgha qoyulghan jaylarning biri. Téxi yéqinda bir xitayning nazaretchilikide yükünüp olturup tash ichidin qashtéshi ilghawatqan Uyghur ayallirining sin körünüshi ijtima'iy taratqularda tarqilip küchlük diqqet qozghighanidi.

Yuqirida tilgha élin'ghan xoten qashtéshi oymichiliq kespiy terbiyelesh ornining tor bétidimu oymichiliq séxida ishlewatqan Uyghur qiz-ayallirining resimlirining bolushi, bu kespiy terbiyelesh dep atalghan jaylarning emeliyette Uyghurlar erzan bahada mejburiy emgekke séliniwatqan orun bolushi mumkinliki heqqidiki gumanlarni kücheytmekte.

Xitay xewerler torining xewiride, yuqiridiki mekteplerning peqet biridila 300 ge yéqin qashtéshi oymichiliq xadimliri yétishtürülgenliki ilgiri sürülgen.