خەلقئارا قەلەمكەشلەر جەمئىيىتى غەربلىك يازغۇچىلارنى كىتابلىرىنىڭ خىتايچە تەرجىمە نۇسخىسىغا دىققەت قىلىشقا چاقىردى

مۇخبىرىمىز ئىرادە
2015.05.21

ئامېرىكىدىكى خەلقئارا قەلەمكەشلەر جەمئىيىتى غەربلىك يازغۇچىلارنى خىتاي ھۆكۈمىتىنىڭ تەكشۈرۈش-فىلتىرلەش ئاپپاراتلىرىدىن ھېزى بولۇشقا چاقىردى.

ئۇلارنىڭ بايان قىلىشىچە، خىتايدا يېقىنقى يىللاردا كىتاب بازىرى جانلىنىپ، چەتئەللىك يازغۇچىلارنىڭ بولۇپمۇ ئامېرىكىلىق ۋە ئەنگلىيەلىك يازغۇچىلارنىڭ كىتابلىرى كەڭ نەشر قىلىنىۋاتقان بولسىمۇ، ئەمما نۇرغۇن كىتابلاردىكى مەزمۇنلار ئاپتورنىڭ خەۋىرىسىز ۋە رۇخسىتىسىز تەھرىرلىنىپ ئېلان قىلىنغان. بولۇپمۇ كىتابتا خىتاينىڭ سەزگۈر مەسىلىلىرى بولغان تيەنئەنمېن ۋەقەسى، تەيۋەن، تىبەت مەسىلىلىرىگە چېتىلىدىغان مەزمۇنلار بولسا ئۇلار ئاپتورنىڭ رۇخسىتى ئېلىنماي تۇرۇپلا كىتابتىن ئېلىۋېتىلگەن ياكى مەزمۇنلىرى ئۆزگەرتىۋېتىلگەن.

مەلۇم بولۇشىچە، بۇنداق ئەھۋال پەقەت سىياسىي سەزگۈرلۈككە ئائىت تېمىلاردىلا ئەمەس، بەلكى جىنسىي مەزمۇندىكى ياكى ھەم جىنسلىقلارغا ئائىت مەزمۇنلار يەر ئالغان كىتابلاردىمۇ ئوخشاش كۆرۈلگەن. باربارا دې ئانگېلىس ئۆزىنىڭ مەشھۇر كىتابى «ئەرلەر ھەققىدە بىلىشكە تېگىشلىك مەخپىيەتلىكلەر» ناملىق كىتابىنىڭ خىتايچە تەرجىمىسىدە 30 پىرسەنت مەزمۇننىڭ ئۆزگەرتىلگەنلىكىنى كىتاب نەشر قىلىنىپ تارقىتىلىپ بولغاندىن كېيىن ئاندىن بايقىغان.

مەزكۇر تەشكىلات بۇ دوكلاتىنى ئامېرىكا، ئاۋسترالىيە، ياۋروپا دۆلەتلىرى ۋە خىتايدىكى يازغۇچىلار، نەشرىيات ئورۇنلىرى ۋە تارقاتقۇچىلارنى زىيارەت قىلىش ئاساسىدا تەييارلاپ چىققان. قەلەمكەشلەر جەمئىيىتى باشلىقى سۇزان نوسېل بىرلەشمە ئاگېنتلىقىغا قىلغان سۆزىدە مەسىلىنىڭ جىددىيلىكىنى تەكىتلەپ «ئەگەر بىز بۇنىڭغا قارشى تەدبىر ئالمىساق، خىتاي ئوقۇرمەنلەرنىڭ ھوقۇقىنى ۋە شۇنداقلا غەربلىك يازغۇچىلارنىڭ پىكىر ئەركىنلىكىنى كاپالەتكە ئىگە قىلالمايمىز» دېگەن.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.