“қош тиллиқ” йәслиләрни омумлаштурушта хотән вә қәшқәр асас қилинған
Уйғур аптоном райони маарип даирилири 2017-йили уйғур дияри бойичә йеңидин вә кеңәйтип қурулидиған 4387 қош тил йәслисиниң һәр қайси җайлардики қурулуш хизмәтлириниң башланғанлиқини билдүргән.
“шинҗаң иқтисад гезити”ниң хәвиридин ашкарилинишичә, уйғур аптоном районлуқ маарип назарити мәхсус бәш тәкшүрүш вә назарәт қилиш гурупписини турпан, қәшқәр, хотән, или вә башқа вилайәтләргә әвәтип, йәслиләрниң қурулуш әһвали һәм башқа мунасивәтлик әһваллар үстидин тәкшүрүш елип барған.
Хәвәрдин ашкарилинишичә, үч йиллиқ һәқсиз оқутулидиған қош тиллиқ йәслиләрни кеңәйтип қуруш вә йеңидин қурушта уйғур дияриниң җәнуби, йәни нопус җәһәттә уйғурлар зич вә әң көп олтурақлашқан наһийә һәм йеза-кәнтләр асасий нишан қилинған. Болупму, үч йиллиқ һәқсиз қош тиллиқ маарипини омумлаштурушта хотән вилайити дәсләпки нишан қилинған икән.
Һазир хотән вилайитидә 480 қош тиллиқ йәсли мәвҗут болуп, қош тиллиқ йәслиләрниң омуми сани бу йил 9-айғичә 1000ға йәткүзүлидикән вә буниңда 244 миң бала оқутулидикән.
Қәшқәр вилайитиму қош тиллиқ йәслиләрни омумлаштуруштики асаслиқ нишанлиқ җай болуп, бу йил қәшқәр вилайитидә 1152 қош тиллиқ йәсли йеңидин қурулидикән.
Әмма даириләр қош тиллиқ йәслиләрни қурушта мәбләғ билән оқутқучи мәсилиси мәвҗутлуқини көрсәткән.
Нөвәттә, һәр қайси җайларда қош тиллиқ йәслиләргә оқутқучи қобул қилиш башланған болуп, оқутқучи қобул қилишта һәтта уйғур тилини билмәйдиған хитай оқутқучиларниңму көпләп қобул қилинидиғанлиқи инкас қилинмақта.
Бир қисим уйғур оқутқучиларниң инкаслиридин мәлум болушичә, қош тили маарипи әмәлийәттә пәқәт хитай тилини асас қилған йәккә тиллиқ маариптин ибарәт болуп, уйғур пәрзәнтлирини йәслидин тартип хитай тилида тәрбийиләш мәқсәт қилинған. Америкидики уйғур кишилик һоқуқ лайиһиси вә дуня уйғур қурултийиму бу һәқтә баянатларни елан қилип, хитай һөкүмитини уйғурларниң өз тилидики миллий маарипиға әһмийәт беришкә, уйғур тилидики алий маарипни әслигә кәлтүрүшкә чақирип кәлмәктә.
- Әлфидар илтәбир америка уйғур бирләшмисиниң йеңи нөвәтлик рәисликигә сайланди
- Қәшқәрдә лагерға адәм тутушта хизмәт көрсәткән сақчиниң қизиму 10 йиллиқ кесилгән
- Хитай бачелетниң зиярити һарписида чәт әлдики уйғурларға түрмидики аилә әзалириниң давасини қилмаслиқ тоғрисида бесим ишләткән
- Қазақистанлиқ уйғур йигити дуня мусабиқисидә 3-орунға еришти
- “шинҗаң сақчи архиплири” ниң ашкарилиниши мунасивити билән мюнхенда хитайға қарши намайиш елип берилди
