Көзәткүчиләр: фотограф қурбанҗан сәмәт давамлиқ түрдә хитай һөкүмитиниң депиға уссул ойнимақта

Мухбиримиз қутлан
2017.08.27

Хитай таратқулириниң хәвәрлиригә қариғанда, фотограф қурбанҗан сәмәт вә униң “мән шинҗаңдин кәлдим” намлиқ китаби хитай һөкүмити тәрипидин чәтәлләрдә давамлиқ тәшвиқ қилинмақтикән.

Бейҗиңдики “хәлқ тори” ниң хәвәр қилишичә, хитай һөкүмитиниң орунлаштуруши билән “қурбанҗан сәмәт әсәрлирини алмаштуруш йиғини” йеқинда ню-йоркта өткүзүлгән.

У, мәзкур паалийәттә сөз қилип мундақ дегән: “һәммила адәм шинҗаңға берип баққан әмәс. Хәлқара җәмийәтниң шинҗаңни техиму яхши чүшиниши үчүн бу қетим ‛мән шинҗаңдин кәлдим‚ дегән һөҗҗәтлик филимни елип кәлдим. Бу филимдә шинҗаңдики һәр милләт пәрзәнтлириниң вәтәнниң һәрқайси җайлири билән дуняниң һәрқайси җайлирида күрәш қиливатқан әһвалини тонуштурулди. Униң иккинчи қисми болған ‛мән шинҗаңға баримән‚ дә җуңгониң ички өлкилириниң шинҗаңға ярдәм бәргәнлики вә шинҗаңни тәрәққий қилдурғанлиқи тонуштурулди.”

Хәвәрдә дейилишичә хитайниң ню-йоркта турушлуқ консулханисиниң баш консули дуң хәйруң тәбрик сөзи сөзләп, “ислаһат вә ечиветилгәндин буян, шинҗаңда қандақ өзгиришләр йүз бәрди? қандақ нәтиҗиләр қолға кәлтүрүлди? қурбанҗанниң әсәрлири бу соалларға мукәммәл һалда җаваб бәрди,” дегән.

Мәзкур паалийәткә хитай һөкүмитиниң қоллиши билән чәтәлләрдә тәшвиқат йүргүзүватқан хитай тәшкилатлири, җүмлидин ню-йорктики “хитайниң тинч бирликкә келишини илгири сүрүш җәмийити” қатарлиқлар қатнашқан.

Муһаҗирәттики уйғур көзәткүчиләр, “фотограф қурбанҗан сәмәт заманимиздики ‛қурбан тулум‚ дур. У йеқинқи йиллардин буян изчил түрдә хитай һөкүмитиниң депиға уссул ойнап кәлмәктә”, дегәнләрни илгири сүрмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.