Хитай «сахароф мукапати» ниң илһам тохтиға берилишиға қаттиқ наразилиқ билдүрди

Мухбиримиз әркин
2019-10-26
Елхәт
Пикир
Share
Принт

Хитай һөкүмити 25‏-өктәбир баянат елан қилип, явропа парламентиниң бу йиллиқ «сахароф пикир әркинлик мукапати» ни атақлиқ уйғур зиялийси илһам тохтиға беришиға қаттиқ наразилиқ билдүрди. Фирансийә агентлиқиниң хәвәр қилишичә, хитай ташқи ишлар министирлиқи илһам тохтини «террорчилиқ» билән әйибләп, явропа парламентини бир «террорчи» ни мукапатлаш билән тәнқидлигән.

Явропа парламенти президенти дәйвид сассоли 24‏-өктәбир бу йиллиқ «сахароф мукапати» ниң 2014‏-йили хитай һөкүмити тәрипидин қолға елинип, муддәтсиз қамаққа һөкүм қилинған илһам тохтиға берилгәнликини җакарлиған. Дәйвид сассоли, илһам тохтиниң «уйғур-хитай хәлқлири арисидики диалог вә чүшинишни илгири сүргән бир зиялий» икәнлики, униң бу җәһәттики хизмити вә көрсәткән җасаритиниң мәзкур мукапатқа лайиқ көрүлгәнликини билдүргәниди. Лекин, хитай ташқи ишлар министирлиқи баянатчиси хуа чүнйиң бу мукапатниң илһам тохтиға берилишида «мәсилә барлиқи» ни тәкитләп, «мән явропаниң хитайниң ички ишлириға, униң әдлийә игилик һоқуқиға һөрмәт қилишини, бир террорчини мукапатлаштин сақлинишини үмид қилимән» дегән. Хуа чүнйиңниң илгири сүрүшичә, у «бу мукапатниң қандақ мукапат икәнлики, униң әһмийити, қиммити яки қандақ тәсири барлиқини билмәйдикән.» 

Лекин, америка кеңәш палатасиниң ташқи ишлар комитети бу мукапатниң илһам тохтиға берилгәнликини тәбриклигән. Мәзкур комитетниң 25‏-өктәбир тветтирда елан қилған баянатида, бу мукапатниң илһам тохтиниң һаятини уйғурларниң һоқуқиға беғишлиғанлиқиға берилгәнлики тәкитлинип, «бирақ 2014-йили өмүрлүк қамаққа һөкүм қилинған илһам тохти мукапатни өз қоли билән алалмайду. Илһам тохти чоқум қоюп берилиши, хитай милйонлиған уйғурни бастурушни тохтитиши керәк» дейилгән. явропа парламентиниң қарари йәнә дуня уйғур қурултийи, уйғур кишилик һоқуқ қурулуши қатарлиқ тәшкилатларниң қарши елишиға еришкәниди.

Пикирләр (0)
Share
Толуқ бәт