Ilgiri Uyghur diyarining mongghulküre nahiyesidiki yépiq terbiye lagérida tutqunlargha xitay tilidin ders ötken we kéyin qazaqistan'gha qéchip chiqqan sayragül sawutbay özining bixeterlikining yenila xewp astida turuwatqanliqini bildürgen.
Sayragül sawut qazaqistan'gha qéchip ötkendin kéyin qazaq saqchiliri teripidin tutqun qilin'ghan we xitaygha qayturulush xewpige duch kelgen. Uning délosi axbaratlarning zor diqqitini qozghighan we xelq'araliq jama'et pikiri netijiside bultur 8-ayda qazaqistan soti uni xitaygha qayturmasliqni qarar qilghan.
"Tashqi siyaset" zhurnilining 6-féwral küni xewer qilishiche, 8-aydiki sot qararidin kéyin, bir guruppa kishiler sayragülning öyige kélip uninggha emdi bu heqte sözlimeslikni, undaq bolmaydiken aqiwitige özi mes'ul bolidighanliqi heqqide agahlandurghan. Sayragül axirida özining adwokati we bashqilarning héch bolmighanda qazaqistanda panahlinish iltimasi qobul bolghuche bolsimu jim turup turush heqqidiki nesiheti bilen xitaydiki lagérlar heqqide sözleshni toxtatqan. Halbuki, shundaq bolushigha qarimay uning qazaqistanda panahlinish telipi ikki qétim ret qilin'ghan.
Sayragül "Tashqi siyaset" zhurniligha qilghan sözide özi qazaqistandin panahliq élishni shundaq arzu qilghan bolsimu, emma xitay hökümitining qazaqistan'gha qiliwatqan bésimidin bu ümidining barghanséri aziyiwatqanliqini éytqan. U yene özining qazaqistanda turup qélish üchün dawamliq süküt qilish yaki lagérlarda körgenlirini ashkarilap, özining wijdani burchini ada qilish otturisida qattiq tallashqa qalghanliqini éytqan.
Sayragül bultur 8-aydiki sotta özining lagérda oqutquchiliq qilghan mezgilide lagérlargha a'it mexpiy matériyallarni körgenlikini ilgiri sürgen idi. Gerche u lagér mesilisidiki sükütini buzushni qarar qilghan bolsimu, emma bixeterliki kapaletke érishmigüche bu heqte sözlimeydighanliqini, özining emdi bashqa döletlerning yardimige mohtaj bolushi mumkinlikini bildürgen.
