Хитайниң шветсийәдики әлчиханиси сайрагүл саутбайниң лагерлар һәққидики сөзлиригә инкас билдүргән

Мухбиримиз әркин
2019-09-06
Share

Хитайниң шветсийәдә турушлуқ баш әлчиханиси йеқинда шветсийәдә панаһлиниватқан сабиқ лагер оқутқучиси сайрагүл саутбайниң лагерлар һәққидики сөзигә инкас қайтуруп, сайрагүлниң ялған сөзлигәнлики, униң һечқачан «кәспий тәрбийиләш мәркизи» дә оқутқучи болуп бақмиғанлиқини илгири сүргән. Сайрагүл саутбай ханим йеқинда шветсийә дөләтлик телевизийә истансисиниң зияритини қобул қилип, уйғур районидики лагерларниң ички әһвалини ашкарилиғаниди.

Сайрагүл 2017‏-йили моңғулкүрә наһийәсидики бир лагерда оқутқучи болуп мәҗбури ишлигән. Униң билдүрүшичә, у лагердики наһәқчиликкә чидимай 2018‏-йили қазақистанға қечип чиқип, бу йәрдики йолдиши вә икки пәрзәнти билән җәм болған. Бирақ қазақистан һөкүмити уни қазақистан чеграсиға қанунсиз кириш билән әйибләп сотлиғаниди. Бу вәқә әйни чағда хәлқара таратқулар вә кишилик һоқуқ тәшкилатлириниң алаһидә диққитини қозғиған. 

Шветсийә һөкүмити бу йилниң башлирида униңға сиясий панаһлиқ берип, аилиси билән шветсийәгә келип орунлишишиға пурсәт яритип бәргәниди. Сайрагүлниң шветсийә телевизийисидә қилған сөзи хитай даирилирини қаттиқ биарам қилғанлиқи илгири сүрүлмәктә. Хитай һөкүмити 2 милйондәк уйғур, қазақ вә башқа мусулманларниң тутқун қилинип, лагерларға қамалғанлиқини изчил рәт қилип кәлгән. У, бу орунларниң радикаллиққа қарши «кәспий тәрбийиләш мәркәзлири» икәнликини илгири сүрүп кәлгәниди. 

Хитай әлчиханиси баянатида, «сайрагүл саутбайниң йеқинда шветсийә дөләтлик телевизийә қанилида хитайниң қанунларға асасән шинҗаңда елип барған террорлуққа қарши туруш, радикаллиқни түгитиш, иҗтимаий муқимлиқни сақлаш тәдбирлиригә төһмәт қилиш, униңға һуҗум қилиштәк мәнтиқсиз сөзләрни қилғанлиқиға диққәт қилғанлиқи» ни тәкитлигән. Баянатта илгири сүрүлүшичә, сайрагүл саутбай һечқачан шинҗаңдики бирәр кәспий тәрбийиләш мәркизи» дә ишләп бақмиған вә шундақла һечқачан тутқун қилинип бақмиғаникән. Баянатта йәнә, униң 2018‏-йили хитай чеграсидин қанунсиз өтүп қазақистанға киргәнлики вә қазақистанда җавабкарлиққа тартилип, җазаланғанлиқи тәкитләнгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.