Қазақ кишилик һоқуқ паалийәтчиси 7 йиллиқи қамаққа һөкүм қилиниш хәвпигә дуч кәлгән

Мухбиримиз әркин
2019-07-26
Share

Қазақистанда "ата юрт" намлиқ кишилик һоқуқ тәшкилати қуруп, лагердики қазақ тутқунлириниң қоюп берилишини тәләп қилиш һәрикити башлиған қазақ паалийәтчи серикҗан билашоғли 7 йиллиқ қамаққа һөкүм қилиниң хәвпигә дуч кәлгән.

Билашоғлиниң адвокати айман өмәрованиң билдүрүшичә, нөвәттә серикҗан билашоғли қазақистан тәптиш даирилири тәрипидин башқиларни "җиһад" қа вә "миллий өчмәнликкә қутратқулуқ қилиш" билән рәсмий әйибләнгән. Билашоғли йеқинқи 5 айдин буян нурсултан (астана) да изчил нәзәрбәнд астида тутуп келиниватқан иди.

Айман өмәрованиң билдүрүшичә, сот мәһкимиси бу һәптә униңға билашоғлиниң 29‏-июл күни сотлинидиғанлиқини уқтурған шундақла тәптиш даирилириниң тәйярлиған әйибнамисини әвәтип бәргән. Әйибнамидә билашоғли алмутада өткүзүлгән бир қетимлиқ йиғинда башқиларни "җиһад" қа чақириш, "миллий өчмәнликкә қутратқулуқ қилиш" билән әйибләнгән. Айман өмәрованиң билдүрүшичә, әгәр сот униңға җинайәт бекитсә, у 2 йилдин 7 йилиғичә қамақ җазасиға һөкүм қилиниши мумкин икән.

Айман өмәрова 24‏-июл алмутада өткүзгән ахбарат йиғинида билашоғлиниң қанунға хилаплиқ қилғанлиқини рәт қилип, "у пәқәт хитайниң лагерлирида қазақ, қирғиз, уйғурларниң кәмситишкә учришиға қарши ахбарат җиһади елип беришни тәкитлигән" дегән. Униң илгири сүрүшичә, қазақистан аманлиқ даирилири униң "җиһад" дегән сөзини кесип елип, билашоғлини әйибләшниң дәлили орнида ишләткән. Серикҗанниң иниси аман билашоғли 26‏-июл радийомизға бәргән учурида тәптиш даирилириниң серикҗан билашоғлини әйибләштә қазақ шаири мухтәр шаханоф вә уйғур районидин келип қазақистан пуқралиқиға өткән бейҗиңпәрәс бирқанчә қазақни гуваһчи қилип қоллиниватқанлиқини билдүргән. Қазақистан даирилири билашоғлини бу йил 3‏-айда алмутадики бир меһманханида тутқун қилип, пайтәхт нурсултанға елип кәткән вә нурсултанда мирзақамақта тутуп турмақта иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт