Jorji soros: "Shi jinping erkin dunyaning eng xeterlik düshmini"

Muxbirimiz erkin
2019-01-25
Élxet
Pikir
Share
Print

Amérikiliq milyardér we ataqliq saxawetchi jorji soros 24‏-yanwar "Dunya iqtisad munbiri" ning yighini ötküzülüwatqan shwétsariyening dawus shehiride nutuq sözlep, xitay re'isi shi jinpingning yuqiri téxnikiliq teqiblesh arqiliq jem'iyetni kontrol qilishqa urunuwatqan, "Erkin dunyaning eng xeterlik düshmini" ikenlikini bildürgen.

Jorji soros dawusta bu sözlerni qilghan del shu küni xitayning mu'awin re'isi wang chishen nutuq sözlep, yersharilishish, erkin soda we hemkarliqni kücheytishni tekitligen idi

Jorji sorosning ilgiri sürüshiche, "Xitay dunyadiki birdinbir istibdat hakimiyet bolmisimu, lékin u dunyadiki eng bay, eng küchlük we eng ilghar téxnologiyege ige dölet" iken. Wén'giriyede tughulghan we 2‏-dunya urushida natsistlar gérmaniyesining jaza lagérliridin hayat qalghan mezkur saxawetchi, xitayning Uyghur rayonidiki yighiwélish lagérlirini tilgha almighan bolsimu, emma uning iqtisadi we téxnologiye küchi "Shi jinpingni ochuq jem'iyetlerning eng xeterlik reqibige aylandurghanliqi" ni bildürgen. Jorji sorosning tekitlishiche, amérika prézidénti tramp xu'awéy, jongshing shirketliridek xitaynila oylaydighan karxanilargha qattiq zerbe bérishi kérek iken.

U agahlandurup: "Eger bu shirketler 5‏‏-g téxnikisining bazirini igiliwalsa, u pütün dunyagha qobul qilghusiz bixeterlik tehditi peyda qilidu" dégen. Jorji sorosning sözi chet'el taratqulirida keng xewer qilindi. Uning sözi xitay tashqi ishlar ministirliqining ghezipini qozghighan. Xitay tashqi ishla ministirliqi bayanatchisi xwa chünying 25‏-yanwar küni uning sözige inkas qayturup, "Uning sözi aq-qara arilashturuwétilgen menisiz bayanat. Baha bérishke erzimeydu" dégen. Lékin jorji soros bu sözlerni gherb elliride xitayning xu'awéy, jongshing shirketliridek yuqiri téxnikiliq karxanilirigha qarita küchlük guman peyda bolghan bir mezgilde qildi.

Toluq bet