Shi jinping üchinchi qétim xitayning re'isi boldi

Muxbirimiz jewlan
2023.03.10

3-Ayning 9-küni, xitay kompartiyesining bash sékritari shi jinping xitay xelq qurultiyining 14-nöwetlik wekilliri yighinida xitayning üchinchi qétimliq dölet re'isi we xitay herbiy komitétining re'isi boldi.

Xitay metbu'atlirida “Shi jinping toluq awaz bilen dölet re'islikige saylandi” déyilgen. “Amérika awazi” torining xewiride körsitilishche, xitay kompartiyesi tallighan 2952 wekilning bu yighinda toluq awaz bérishi, birmu qarshi awazning chiqmasliqi shert iken. Yene kélip bu “Saylam” da shi jinpingdin bashqa birmu namzat yoq iken.

“Amérika birleshme agéntliqi” ning xewirige qarighanda, 2012-yil xitayning hakimiyet béshigha chiqqan we reqiblirini bir-birlep meghlub qilghan shi jinping hazir xitayning yuqiri qatlimida mutleq nopuzgha ige shexs bolup, shekilwazliq bilen tolghan bu qurultayda qayta re'is bolup saylinishi normal ehwal iken.

Shi jinping yene bu yighinda 2 milyon xitay eskirige qomandanliq qilidighan herbiy ishlar komitétining re'islikige “Saylan'ghan” bolup, herbiy komitét emeliyette döletke emes, partiyege qaraydiken.

“Fransiye agéntliqi” ning xewiride éytilishiche, bu yil 69 yashqa kirgen shi jinping, xitay rehberlirining ikki qararliq wezipe ötesh cheklimisini alliqachan buzup tashlap, ömürlük hoquq tutush yolini hazirlighan bolup, bashqa reqibliri chiqmighan ehwalda u yene 70 nechche yashqa kirgiche xitayni kontrol qilip turidiken.

Shi jinping bu wekiller yighinida amérika bashliq gherb ellirining xitayni qismaqqa alghanliqini we xitayning tereqqiyatigha misli körülmigen derijide tosqunluq qiliwatqanliqini, xitayni bu palaketlerdin aman-ésen ötküzidighan shexsning özi ikenlikini jakarlighan.

“Fransiye radiyosi” torining xewer qilishiche, amérika axbarat organliri 8-mart küni dölet mejlisige sun'ghan bir doklatta, üchinchi qétim re'is bolghan shi jinpingning kelgüsi bir nechche yilda teywenni bésiwélishqa hemde amérikaning tesirini ajizlitishqa urunushi mumkinliki körsitilgen. Halbuki, shi jinpingning aldida u hel qilishqa tégishlik nurghun kirzislar, yeni xitay iqtisadining chöküshi, nopusning qérilishishi, amérika bilen bolghan munasiwetning yamanlishishi, halqiliq téxnikida ajizliqi, teywen mesilisi we Uyghur musulmanlirining kishilik hoquq mesilisi qatarliqlar bar iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.