"Shi jinping döletni idare qilish toghrisida" ning 2‏-tomi Uyghurchigha terjime qilip tarqitilghan

Muxbirimiz erkin
2019-05-31
Share

"Shi jinping döletni idare qilish toghrisida" namliq kitabning 2‏-tomi yéqinda Uyghurche, tibetche, mongghulche, qazaqche, koréyechidin ibaret 5 xil tilgha terjime qilinip birla waqitta tarqitilghan.

Uninggha shi jinpingning 2014-yili 8‏-aydin 2017‏-yili 9‏-ayghiche bolghan mezgildiki sözi, söhbiti, nutiqi, yolyoruqi we tebrik télégrammisi qatarliq 99 maqale 29 parche resim kirgüzülgen. Bu kitabning xitay hökümiti 2 milyondek Uyghur, qazaq qatarliq musulman türkiy xelqlerni yighiwélish lagérlirigha qamap, ularning medeniyiti, tili, diniy étiqadi we örp-adetlirini birdek chekligen, Uyghur jem'iyitige qarita omumyüzlük teqibleshni yolgha qoyghan bir mezgilde 5 xil tilgha terjime qilinip tarqitilishi diqqet qozghimaqta.

Közetküchilerning ilgiri sürüshiche, bu kitabning az sanliq milletler tiligha terjime qilinishi bu rayonlarda idé'ologiyelik kontrolluqning dawamliq kücheytilidighanliqini köristidiken. Shi jinping 2016‏-yildin bashlap kompartiye ichidiki bezi showinist kadir we mutexessislerning "2‏-Ewlad milletler siyasiti" teshebbusini qobul qilip, az sanliq milletlerni omumyüzlük mejburiy xitaylashturushqa bashlighan. Uning siyasiti Uyghur aptonom rayonida 2 milyondek Uyghur, qazaq we bashqa milletlerning lagérlargha qamilishini keltürüp chiqarghan. Bu gherb démokratik döletlirining we xelq'ara kishilik hoquq teshkilatlirining qattiq tenqidige uchrap, "Bu 1930‏-yillardin béri körülüp baqmighan eng zor kishilik hoquq krizisi" dep tekitlen'genidi. Lékin, "Shinjang géziti" ning 31‏-may xewiride bu kitabta "Shi jinpingning yéngi dewr junggoche sotsiyalizm idiyesining tereqqiyat tomuri we asasliq mezmuni merkezlik eks ettürülgen" liki ilgiri sürülgen.

Xewerde qeyt qilinishiche, bu kitab milliy rayonlardiki "Her qaysi milletlerning ulugh wetenni étirap qilishi, jungxu'a millitini étirap qilishi, jungxu'a medeniyitini étirap qilishi, junggo kompartiyesini étirap qilishi, junggoche sotsiyali'izimni étirap qilishini üzlüksiz kücheytidiken." lékin kishilik hoquq teshkilatlirining ilgiri sürüshiche, Uyghurlarning hazirqidek keng kölemlik lagérlargha qamilip, kishilik hoquqning éghir depsende qilinishida shi jinpingning éghir jawabkarliqi bar iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet