Shiwétsiye hökümiti jasusluq bilen shughullan'ghan bir xitay muxbirini chégradin qoghlap chiqarmaqchi bolghan

Washin'gtondin muxbirimiz jewlan teyyarlidi
2024.04.09

Shiwétsiye hökümiti ötken yili 10-ayda jasusluq gumani bilen tutqan bir xitay muxbirini chégradin qoghlap chiqarmaqchi bolghan.

Shiwétsiye taratquliridin “Gotéborgs pochtisi” gézitining 8-aprél künidiki xewirige qarighanda, shiwétsiye xewpsizlik tarmaqliri ötken yili 10-ayda xitay muxbiri chén shöféyni jasusluq gumandari dep tutqan bolup, uni “Ötken on yilda shiwétsiye dölet xewpsizlikige tehdit peyda qilghan” dep eyibligen.

Shiwétsiyediki “Xitay taratqusi” (KinaMedia)  namliq metbu'at ashkarilighan tepsilatlardin qarighanda, chén shöféy 20 yil awwal shiwétsiyege köchmen bolghan,  shiwét erge tégip bir baliliq bolghan. U shiwétsiyede chiqidighan “Yéshil pochta” gézitide muxbir bolup ishlesh bilen bir waqitta, xitay istixbarat xadimliri bilen hemkarlashqan. U yene shiwétsiyediki xitay elchixanisi bilen qoyuq bardi-keldi qilghan. Chén shöféyning bashqurushidiki “Yéshil pochta” géziti emeliyette xitayning hökümet taratquliri we  xitay kompartiyesining shiwétsiyediki birlik sep bölümi bilen yéqin alaqini saqlap kelgen. Chén shöféy bu gézittin paydilinip, “Shinjang foto süret körgezmisi” we bashqa medeniyet pa'aliyetlirini uyushturup, Uyghur rayonini nuqta qilghan köz boyamchiliq teshwiqati élip barghan. U yene bu gézit arqiliq xitay hökümitining dumbiqini chélip, “Shinjangdiki térrorluqqa qarshi küresh, diniy esebiylikni yoqitish we kishilik hoquq mesilisi” ge a'it xewerlerni tarqatqan.

Xewerde éytilishiche, shiwétsiye hökümiti 2010-yili xitay “Xelq géziti” ning  bir muxbirini jasusluq qilmishi bilen eyiblep, chégradin qoghlap chiqarghan.  Eger bu qétim 6 ay qamaqta yatqan chén shöféy chégradin qoghlap chiqirilsa, shiwétsiye-xitay munasiwitige xéli éghir tesir yétidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.