Хитай нопус әң көп өлкә - сичуәндә икки пәрзәнтлик болуш сияситини рәсмий башлиди

Хитай хәлқ қурултийи 2016 - йили 1 - айдин башлап, пиланлиқ туғут сияситигә өзгәртиш киргүзгән йеңи лайиһәсини йолға қойған иди. Хитайдики нопус әң көп вә әң зич өлкиләрдин бири сичүән өлкисидә икки пәрзәнтлик болушқа рәсмий йол қоюлған болуп, “җуңго учур тори” ниң хәвиридин мәлум болушичә, 22 - январ күни ечилған сичуән өлкисиниң 12 - нөвәтлик хәлқ вәкилләр қурултийи даимий комитетиниң 21 - қетимлиқ йиғинида “сичуән өлкисиниң нопус вә пиланлиқ туғут низами” (түзитиш киргүзүлгән нусхиси) қарап чиқип мақулланди вә “омумйүзлүк икки пәрзәнтлик болуш” сияситини йолға қоюштики маслаштурулидиған чариләр айдиңлаштурулди.

Сичуән өлкисиниң мәзкур йеңи йолға қоюлидиған низамида әслидин бар болған кечикип той қилишни мукапатлаш һәққидики бәлгилимә чиқириветилгән.

Мәзкур низам бойичә йәнә, қанун - бәлгилимигә мас келидиған пәрзәнтлик болған әр - аяллар қанун - бәлгилимидә бәлгиләнгән туғутлуқ арамдин башқа, аял тәрәп йәнә 60 күн узартип арам алалайдикән вә мааш вә параванлиқ тәминатлири өзгәрмәйдикән. Сичүәндә йолға қоюлған мәзкур икки пәрзәнтлик болушқа аит йеңи низамда бир қатар параванлиқ чарилири бекитилгән икән.

Икки пәрзәнтлик болушқа аит йеңи бәлгилимә йеңи йил кириш билән хитайниң бир қисим өлкилиридә омумлаштурулған болуп, әнхуй, гуаңши, йүннән вә башқа өлкиләр сичүән өлкисидикигә охшаш бир қатар йеңи параванлиқ бәлгилимилирини чиқарған.