Amérikaning “Skéchérs” shirkitining ürümchide dukan échishi tenqidlerge duch keldi

Amérikaning Uyghur mejburiy emgikige chétishliq xitay shirketlirige jaza yürgüzüshige qarimay, amérikidiki ayagh we kiyim-kéchek shirkiti “Skéchérs” (Skechers) ürümchide yéngi sétish merkizi achqan.

“Amérika awazi” torining 8-öktebirdiki xewiride déyilishiche, bu dukan 9-ayning 28-küni, xitayning “Dölet bayrimi heptisi” din bir kün burun, yeni xitay xéridarliri eng köp mal sétiwalidighan künlerge ülgürtüp échilghan.

“Skéchérs” shirkitining ürümchide dukan échishi tézdin kishilik hoquqni teshebbus qilghuchilarning tenqidige uchridi. Ular mezkur shirketning mejburiy emgek eng éghir bolghan rayonda tijaritini kéngeytkenlikini, shuningdek iqtisadiy menpe'etni dep kishilik hoquq mesilisini qayrip qoyghanliqini eyibligen. Kommunizm qurbanliri xatire fondining aliy tetqiqatchisi adri'an zénz “Amérika awazi” gha qilghan sözide, “Skéchérs shirkitining herikiti shirketning hökümetler arqiliqla emes, istémalchilar teripidinmu jawabkarliqqa tartilishi kéreklikini ochuq eskertidu” dégen.

Xitayning Uyghur élidiki Uyghur we bashqa milletlerge qaratqan kishilik hoquq depsendichiliki ichide mejburiy emgek eng éghir mesilige aylan'ghan bolup, amérika hökümiti 2022-yili “Uyghur mejburiy emgikining aldini élish qanuni” ni maqullap, Uyghur élide ishlepchiqirilghan mejburiy emgekke chétishliq mehsulatlarni import qilishni cheklep kéliwatqanidi.

Xewerde éytilishiche, skéchérs shirkiti ilgirimu Uyghur élidiki mejburiy emgekke chétishliqi sewebidin tekshürüshke duch kelgeniken. Awstraliye istratégiyelik siyaset tetqiqat orni 2020-yil élan qilghan doklatta, mezkur shirketke mal teminligüchining Uyghur ishchilirini mejburiy emgekke salghanliqi pash qilin'ghan bolup, skéchérs shirkiti buni inkar qilghan.

2024-Yil 10-ayning 2-küni, amérika weten xewpsizliki ministirliqi “Uyghur mejburiy emgikining aldini élish qanuni” boyiche, yene ikki xitay shirkitini qara tizimlikke alghan bolup, cheklen'gen shirketlerning omumiy sani 75 ke yetken. Xitaymu buninggha qarshi heriketke ötüp, amérikaning kélwin klén (Calvin Klein) kiyim-kéchekliri shirkitini bashquridighan PVH shirket guruhini “Shinjangdin paxta we kiyim-kécheklerni sétiwélishni toxtitish arqiliq xitay qanunigha xilapliq qildi” dep eyibligenidi.

Mutexessislerning bildürüshiche, skéchérsgha oxshash shirketlerning kishilik hoquq mesilisige qarimay, xitayda, jümlidin Uyghur élide soda qilishi iqtisadiy jehette xeterge tewekkül qilish bolsimu, shirketning béshidikiler uni bixeter tallash dep hésablighan.