Besher esed süriyede urush toxtitish pilanini qollaydighanliqini bildürgen

Süriye prézidénti besher esed charshenbe küni hepte axirida küchke ige bolidighan süriyediki urush toxtitishni qollaydighanliqini bildürdi.

Amérika awazining süriye dölet uchur agéntliqigha asaslinip xewer qilishiche, besher esed rusiye prézidénti wladimir putin bilen charshenbe küni téléfonda sözliship, özining rusiye bilen amérika arisida pütüshülgen urush toxtitish pilanini qollaydighanliqini bildürgen.

Xewerde éytilishiche, bu urush toxtitish pilani da'ésh, elqa'idening süriye bölümi we elnusre fronti dep atilip, b d t bixeterlik kéngishi teripidin térrorluq teshkilati dep tizimgha élin'ghan teshkilatlargha zerbe bérishni öz ichige almaydiken.

Seyshenbe küni amérika dölet ishliri ministiri jon kerri dölet mejlisidiki guwahliq bérishte mezkur tinchliq pilanining süriyediki ichki urushqa xatime béridighan yaxshi chare ikenlikini bildürgen.

Krémil bayanatchisi prézidént putinning bu mesile heqqide iran prézidénti we se'udi erebistan padishahi bilen sözleshkenlikini bildürgen.

Melum bolushiche, amérika we rusiye rehberliri pütüshken süriyede waqitliq urush toxtitish kélishimi 27-féwral küni resmiy küchke ige bolidiken.