Mayk galigér: “Shi jinping heqiqeten teywen'ge hujum qilishning teyyarliqida”

Amérika awam palatasi xitay ishliri alahide komitétining bashliqi mayk galigér (Mike Gallagher) 3-ayning 7-küni amérika “Foks téliwiziyesi” ning ziyaritini qobul qilghanda éytqan sözide, xitay re'isi shi jinpingning heqiqeten teywen'ge hujum qilish niyitining barliqini, chünki uning yéqinda “Xitay xelq azadliq armiyesi” ning yilliq xamchotini biraqla ashurghanliqini bildürgen.

Mayk galigér mundaq dégen: “Shi jinping teywen'ge hujum qilish pilanini tüzüp bolghanliqini, peyti kelgende qoralliq heriket qilidighanliqini éniq bildürüp boldi. U‚xitay azadliq armiyesi‛ning xamchotini yene östürdi. Démek, ukra'ina urushidin kéyinla uning teywen'ge hujum qilishqa aldirawatqanliqi éniq”.

“Foks xewerliri” torida bérilgen melumatqa qarighanda, rusiyening ukra'inagha hujum qilishi xitaygha medet bolghan. Xitay hökümiti 3-ayning 5-küni “Xitay xelq azadliq armiyesi” ning yilliq xamchotini 7.2 Pirsentke chiqarghan bolup, 2022-yildikidin 16 milyard dollar ashurghan. Xitayning nöwettiki herbiy xamchoti 230 milyard dollar bolup, 2022-yildikidin 16 milyard dollar köpeytken we 2013-yilgha sélishturghanda bir hesse qatlighan. Buninggha köre, amérika xitayning yéqin kelgüside teywen'ge hujum qilishi mumkinliki heqqide signal bergen hemde xitayni ukra'inagha hujum qilghan rusiyege yardem bermeslik heqqide agahlandurghan.

Mayk galigér bu heqte éniq toxtilip: “Xitayning teywen'ge hujum qilishining aldini élishta kéchikip qalmasliq üchün, amérika we uning ittipaqdashlirining u yerge qoshun turghuzushi, hindi-tinch okyan bash shitabining ulargha herbiy lazimetliklerni teminlishi shert. Biz téz heriket qilip, teywen'ge zomigerlik qiliwatqan küchlerni tazilishimiz, xitayning iqtisadiy taktika arqiliq amérikaning dölet ichi we chet eldiki menpe'etini ziyan'gha uchritishining aldini élishimiz kérek” dégen.