Taylandtiki bombiliq hujumgha chétilip qolgha élin'ghan ikki Uyghur yashning soti bashlandi

Muxbirimiz irade
2016-11-15
Élxet
Pikir
Share
Print

Roytérs agéntliqining xewer qilishiche, ötken yili bangkoktiki sérin ibadetxanisida yüz bergen partlashqa chétilip qolgha élin'ghan mir'eli yüsüp we bilal muhemmed isimlik ikki neper Uyghurning dewasi seyshenbe küni bangkoktiki herbiy sotta bashlandi. Ularning soti ölchemlik Uyghur tili sözleydighan terjiman yoq bolush sewebidin üch qétim kéchiktürülgen idi.

Melum bolushiche, bu qétimliq sottiki terjimanni xitay elchixanisi teminligen bolup, mir'eli we bilallar sotta yene terjiman'gha étiraz bildürgen. Ular xitay elchixanisi teminligen terjimanni ishlitishni xalimaydighanliqini, chünki xitay hökümitining Uyghurlargha hörmet qilmaydighanliqini éytqan. Biraq sotchilar bu ikki neper terjimanning Uyghurchini rawan sözleydighanliqini, shunga özlirining ularni layiq dep qaraydighanliqini éytip sotni dawam qilghan.

Bilal muhemmedning adwokati chuchart kanpayning roytérs muxbirigha éytishiche, bu terjimanlar Uyghur élidin kelgen we Uyghurchisi rawan iken. Shunga sot dawam qilishi mumkin iken. Emma xewerlerde bu terjimanlarning millitining néme ikenliki éniq tilgha élinmighan.

Firansiye agéntliqining éytishiche, sotqa közetküchi bolup qatnashqan "Xelq'ara qanunshunaslar komitéti" asiya diréktori sam zarifi terjimanlarning xitay elchixanisi teripidin teminlinishining herbiy sotning adil qarar chiqirishigha qarita jiddiy endishe qozghaydighanliqini éytip, ularning dawasigha herbiy sotta emes, memuriy sotta qarap chiqishqa chaqirghan.

Yuqiridiki bu ikki Uyghur yash 2015-yili 17-awghust küni taylandtiki dangliq sérin ibadetxanisigha yüz bergen bombiliq hujumdin kéyin qolgha élin'ghan idi. Analizchilar bu weqeni 2015-yili 7-ayda taylandtin xitaygha qayturup bérilgen 109 neper Uyghur muhajir mesilisige baghlap, buning Uyghur térrorchilirining öch élish herikiti bolushi mumkinlikini ilgiri sürüshken.

Ularning adwokatining éytishiche, ularning dawasi 2018-yilighiche dawam qilishi mumkin iken.

Toluq bet