Баңкоктики партлашқа четишлиқ дәп тутуп турулуватқан икки уйғур гумандарниң даваси йәнә арқиға сүрүлди

Мухбиримиз ирадә
2016.09.15
Share on WhatsApp
Share on WhatsApp

Фирансийә агентлиқиниң хәвәр қилишичә, 2015-йили 8-айда йүз бәргән бомба һуҗумидин кейин қолға елинған мирәли йүсүп, муһәммәд билалларниң пәйшәнбә күни ечилмақчи болған соти тәрҗиман сәвәбидин кечиктүрүлгән.

Хәвәрдин қариғанда, сотта мирәли йүсүп сот тәрипидин тәйинләнгән өзбек аял тәрҗиманниң гепини толуқ чүшинәлмигәнликини ейтқан. Буниң билән сотчи уларниң сотини 10-айниң 13-14-күнлиригә сүрүшни қарар қилған. Уларниң даваси өткән 8-айдиму йәнә тәрҗиман сәвәбидин сүрүлгән иди.

Хәвәрдә ейтилишичә, һәрбий сотта көрүлүватқан бу давада сотчи илгири ақлиғучилар тәрипидин тәвсийә қилинған тәрҗиманни ишлитишни рәт қилип, бу даваниң хәвпсизликкә четилидиған мәсилә икәнликини, шуңа чоқум сот өзиниң тәрҗиман тәйинләйдиғанлиқини ейтқан икән.

Мирәли йүсүп вә муһәммәд билал һәр иккилиси өзлириниң гунаһсизлиқи, вәқә билән алақиси йоқлуқини илгири сүрүп кәлмәктә. Баңкок һөкүмитиниң дава үстидики пәрқлиқ ипадилириму илгири түрлүк гуманларға йол ачқан.

Хәвәрдә ейтилишичә, хәлқара сотчилар комитетиниң асия директори сәм зарифи, “бу дегән тайланд һөкүмити үчүн интайин муһим бир дело һесаблиниду. Дело гумандарлири сотсиз тутуп турулуватқан бир шараит астида, тайланд һөкүмитиниң тәрҗиман тәйинләйдиған нәччә ай вақти бар туруқлуқ, немишқа керәклик тәрҗиманни тәйярлиялмиғанлиқи бир мүҗмәл әһвал” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.