Uyghurlar diyaridiki kömürdin gaz élish qurulushi muhitni éghir derijide bulghimaqta

Muxbirimiz eziz
2017-02-08
Share

Uyghurlar diyaridiki cheklik su menbesi we tebi'iy muhitning buzulushi izchil halda her sahe kishilirining diqqitini qozghap kéliwatqan témilarning biridur.

Shu mesililer qatarida édwar wongning “Nyuyork waqti” gézitining bügünki sanida élan qilin'ghan maqalisi Uyghurlar diyaridiki kömürchilikte muhitni bulghawatqan yene bir mesilini kishilerning semige saldi.

Melum bolushiche, Uyghurlar diyaridiki kömürning zapas miqdari xitay boyiche eng köp bolup, da'iriler qumul, ghulja qatarliq jaylarda kömürdin gaz chiqirish qurulushini izchil dawam qilmaqta iken. Bu qurulushning tennerxi tolimu qimmet chüshidighan bolup, adette ghayet zor miqdarda su ishlitish arqiliq tamamlinidiken. Buningda téximu éghir bolghini kömürni köydürüp gaz élish jeryanida zor miqdarda karbon töt oksid qoyup bérilidighan bolup, buning muhitni bulghash derijisi nahayiti yuqiri bolidiken.

Gerche xitay mutexessisliri, chet'el alimliri we bashqa alaqidar shexsler bu xil qurulushni toxtitish heqqide teklip sun'ghan bolsimu, da'iriler bu xildiki qurulushqa izchil yol qoyup kelmekte iken. Buningdiki asasliq seweb kömürni biwasite yötkep kétishtin köre, uni shu yerdila köydürüp gazgha aylandurup élip ketkende téximu köp énérgiye bayliqini toshup kétishke mumkin bolidiken.

Melum bolushiche, xitay döliti muhitni qoghdash, kilimat özgirishi qatarliq saheler boyiche xelq'araliq ehdinamilerge imza qoyghan döletlerning biri iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet