Teywen b d t “Yémek-ichmek we yéza igilik komitéti” ni teywenni kemsitish bilen eyibligen

Teywen özining birleshken döletler teshkilatining xelq'ara béliqchiliq sana'iti yighinidin cheklen'genlikige naraziliq bildürgen.

Birleshme agéntliqining xewiridin qarighanda, teywenning merkizi agéntliqi xewer tarqitip, b d t gha qarashliq “Yémek-ichmek we yéza igilik komitéti” teripidin bu nöwet italiyede chaqirilghan yighin'gha qatnashmaqchi bolghan ikki neper teywenlik wekilning yighin'gha qatnashturulmighanliqini, buning bilen teywen tashqi ishlar ministirliqining bu komitétqa naraziliq xéti ewetip, ularni teywenni kemsitish bilen eyibligenlikini bildürgen.

Xewerde, teywenning bu yighin'gha qatnishishtin cheklinishining keynide xitay hökümitining qoli bar, déyilgen bolsimu bu uchurning qandaq igilen'genliki tilgha élinmighan.

Melum bolushiche, teywenlik ezalar b d t gha qaraydighan bu komitétning yighinlirigha 2003-yilidin étibaren mutexessis yaki hökümetke qarashliq bolmighan organlarning ezasi süpitide qatniship kelgen iken. Biraq, bu nöwet ular tuyuqsizla qatnishishtin cheklen'gen.

Birleshme agéntliqining xewer qilishiche, bu qétimliq weqe xitay hökümitining teywen mesilisi üstidiki diplomatik bésimini chingitiwatqanliqining ipadisi iken. Téxi bir qanche kün awwal méyipler olimpik tenheriket yighinigha qatnashmaqchi bolghan teywenlik tenheriketchilerning formisidiki dölet belgisi xitayning qarshiliqigha uchrighanliqtin özgertilishke mejbur bolghanliqi heqqidiki xewer ashkarilinip, teywenliklerni narazi qilghan idi.