Америка авам палатаси украина, исраилийә вә тәйвәнгә ярдәм бериш билән тик токни чәкләйдиған қанун лайиһәсини мақуллиған

Вашингтондин мухбиримиз уйғар тәйярлиди
2024.04.22

Америка авам палатаси 20-апрел украина, исраилийә вә тәйвәнгә ярдәм бериш билән тик-токни чәкләйдиған қанун лайиһәсини мақуллап америка кеңәш палатасиға йоллиған.

Ройтерс агентлиқи (Reuters) ниң хәвиригә асасланғанда, америка авам палатаси шәнбә, йәни2024-йили 4-айниң 20-күни күни икки партийәниң кәң қоллиши билән украина, исраилийә вә тәйвәнгә 95 милярд долларлиқ ярдәм беридиған қанун лайиһәсини мақуллап америка кеңәш палатасиға йоллиған. Бу қанун лайиһәси пат арида кеңәш палатаси тәрипидин өткүзүлгәндин кейин пирезидент җо байденниң имзаси үчүн йоллинидикән.

Бу қанун лайиһәси исраилийәгә ярдәм қилиш, тәйвән вә һинди-тинч окяндики американиң иттипақдашлириға бихәтәрлик ярдими көрситиш, хитайниң игидарчилиқидики иҗтимаий алақә детали тик-ток (TikTok) ни чәкләш вә мусадирә қилинған русийә мал-мүлүклириниң украинаға берилиши қатарлиқ мәзмунларни өз ичигә алидикән.

Бу қанун лайиһәси тик-токни сетишқа мәҗбурлаш, әгәр сатмиған тәқдирдә тик-токни пүтүнләй чәкләшни тәләп қилидикән. Бу лайиһә қанун болуп қобул қилинғандин кейин, әгәр тик-токни сетиш бир йил ичидә йүз бәрмисә, тик ток америкада чәклинидикән.

Майкел соболик (Micheal Sobolik) кә охшаш мутәхәссисләрниң қаришичә, хитай тик-ток арқилиқ америка җамаәт пикриниң ичигә “соқунуп кириш” арқилиқ америка демократийәсигә тәһдит пәйдә қилмақтикән. Улар, тик-токни дөләт бихәтәрлики җәһәттә “америка бүгүн дуч келиватқан әң чоң тәһдитләрниң бири болмақта” дәп көрсәткән.

Ақсарай өткән җүмә күнидики баянатида мундақ дегән: “дуня америка дөләт мәҗлисиниң немә қиливатқанлиқини көзитиватиду. Бу қанун лайиһәсиниң мақуллиниши муһим, бу америка рәһбәрлик қатлиминиң күчлүклүки тоғрисида дуняға күчлүк учур бериду. Байден һөкүмити авам палатаси вә кеңәш палатасиниң бу қанун лайиһәсини тезликтә тәстиқлап пирезидентқа әвәтишни тәләп қилиду”.

Бу қанун лайиһәсигә асасланғанда, украинаға 60 милярд 840 милйон доллар, американиң қорал-ярағ, пай чеки вә әслиһәлирини толуқлиши үчүн 23 милярд доллар, исраилийә үчүн 26 милярд доллар, инсанпәрвәрлик еһтияҗи үчүн 9 милярд 100 милйон доллар, һинди-тинч окян райони үчүн 8 милярд 120 милйон доллар берилидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.