Mutexessisler amérikani tik-tok peyda qilghan “Chöchüterlik tehdit” heqqide agahlandurdi

Washin'gtondin muxbirimiz erkin teyyarlidi
2024.04.15

Amérikaning xitay mesililiri mutexessisi maykél sobolik (Micheal Sobolik) 14-aprél amérikani xitayning kontrolluqidiki tik-tok ijtima'iy alaqe supisi peyda qiliwatqan “Chöchüterlik tehdit” heqqide agahlandurup, tik-tokni xitayning amérikagha qarshi qolliniwatqanliqini bildürgen. Maykél sobolikning 14-aprél amérikadiki “Fokus reqemlik xewerler” qanilining ziyaritini qobul qilghanda tekitlishiche, “Hazir xitayning amérika jama'et pikrini kontrol qilish iqtidari intayin küchlük” iken. Maykél sobolikning bu agahlandurushi amérika awam palatasining yéqinda mutleq köp awazda tik-tokni sétishqa mejburlash heqqidiki qanun layihesini maqullighan bolsimu, lékin bu qanun layihesining kéngesh palatasida éniqsiz ehwalda turuwatqan bir peytide éytilghan.

Maykél sobolikning qeyt qilishiche, xitayning tik-tok arqiliq amérika jama'et pikrining ichige “Suqunup kirishi” amérika démokratiyesige tehdit peyde qilmaqtiken. U, tik-tokni dölet bixeterliki jehette “Biz bügün duch kéliwatqan eng chong tehditlerning biri bolmaqta” dep körsetken.

Maykél sobolik mundaq dégen: “Tik-tok noqul téxnologiye jehettiki endishila emes, ijtima'iy axbarat mesilisimu emes. Tik-tok xitayning bügünki amérikagha qarshi eng chong gheyriy simmétirik ewzellikidur. ”

Sobolikning qeyt qilishiche, tik-tok xitay kompartiyesining amérika démokratiyesige qarita peyda qiliwatqan eng jiddiy tehditige wekillik qilidiken.

Bash ishtabi sin'gaporgha jaylashqan tik-tok ijtima'iy alaqe supisi, xitayning béyjingni baza qilghan “Zijyé tyawdong” yeni “Bayti dens” namliq téxnika shirkitige qarashliq bolsimu, mezkur ijtima'iy alaqe supisi özining xitay hökümiti teripidin kontrol qilinidighanliqini ret qilip kelgen. Yéngi neshr qilin'ghan “Xitayning chong oyunigha qarshi küresh: amérikaning hökümranliq istratégiyesi” namliq kitabning aptori maykél sobolikning körsitishiche, nöwette amérikaning yérimi xitay kompartiyesining kontrolluqidiki bu epni ishlitiwatqan bolup, xitay kompartiyesi bu arqiliq amérika jama'et pikrini kontrol qilalaydiken hem özining teshwiqatini élip baralaydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.