Хотән-чақилиқ төмүрйолиниң тамамлиниши диққәт қозғимақта

Мухбиримиз әзиз
2021-09-29
Share

Хитай һөкүмитиниң "оттура вә узун мусапилик төмүрйол қурулуши пилани" дики муһим түрләрдин болған хотән-чақилиқ төмүр йолиға релис ятқузуш қурулуши йеқинда тамамланған болуп, хитай ахбаратлирида бу һал "әң чоң чөллүкни төмүрйол билән һалқисиман орашниң тамамлиниши" дәп тәшвиқ қилинмақта.

Хитай башқурушидики "шинҗаң хәвәрлири" ториниң 27-сентәбирдики хәвиридә ейтилишичә, 825 километирлиқ бу төмүрйол линийәси хотән шәһиридин башлинип лоп, чира, керийә, нийә қатарлиқ җайлардин өтүп чақилиққа тутишидикән. Буниң билән тарим ойманлиқини толуқ орайдиған төмүрйол линийәси чиңхәйдики голмудқа вә гәнсудики ләнҗуға биваситә тутишидиған вәзийәт шәкилләнгән. Хәвәрдә бу төмүрйол линийәсиниң тамамлиниши һәққидә сөз қилинип "әмди җәнубий шинҗаңдики кишиләр турпан йолиға маңмайла удул чиңхәй өлкиси ‍арқилиқ ичкири өлкиләргә баралайду. Буниң билән әслидики сәпәр мусаписи миң километир қисқирайду" дейилиду.

Әмма муһаҗирәттики анализчилар изчил хитай һөкүмитиниң уйғур дияридики ташйол, төмүрйол вә айродром қурулушини "хитай һөкүмитиниң шәрқий түркистанниң тәбиий байлиқини хитайға йөткәш вә ичкиридин хитай нопусини көчүрүш урунушини түп мәқсәт қилиду" дәп қарап келиватқаниди. Германийәлик лагиршунас адрян зензниң бу һәқтики әң йеңи доклатида хитай һөкүмитиниң 2040-йилиға барғанда тарим вадисидики хитай көчмәнлириниң нопус нисбитини уйғурлар билән тәңләштүрүш, шу арқилиқ уйғурларниң бу җайлардики нопус қурулмисида мутләқ үстүнлүкни игиләш вәзийитини бузуп ташлашни бир зор қурулуш сүпитидә иҗра қиливатқанлиқи, нөвәттә уйғур дияриға хитай нопусини зор санда көчүрүш нәтиҗисидә нопус нисбитидики өзгиришниң башлинип болғанлиқи алаһидә йорутулған иди. Хитай һөкүмитиниң йеқинда тамам болған бейҗиң-үрүмчи ташйол қурулуши вә бу қетимқи хотән-чақилиқ төмүр йол қурулушиға бу қәдәр зор мәбләғ селиши бу мәсилини чөридигән гуманларға сәвәб болмақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт