Pirézidént tramp 2025-yilining béshida xitaydin %40 ke yéqin tamozhna béji almaqchi iken

“Roytérs agéntliqi” ning iqtisadshunaslar arisida élip barghan ray sinash netijiside körsitilishiche, amérika kéler yilining béshida xitaydin import qilinidighan mallargha %40 ke yéqin tamozhna béji élishi, buning netijiside dunyada ikkinchi chong iqtisadiy hésablan'ghan xitay iqtisadining éshishi 1 pirsent töwenlishi mumkin iken.

Yéqinda xitay memliketlik xelq qurultiyining yighinida, qiyin ehwalda qalghan xitay iqtisadi we donald trampning xitay bilen yéngi soda urushini bashlash éhtimaligha qarita yéngi qarar maqullan'ghanidi. Xitay yene, yerlik hökümetlerning ghayet zor qerzni tölishige yardem bérish üchün, 1 tirilliyon 400 milyard dollarliq iqtisadni righbetlendürüsh pirogrammisini jakarlighanidi.

Xitay nopusi aziyiwatqan bir weziyette, xitayda 90 milyon'gha yéqin turalghu öyning quruq halette turushi, öy-mülük shirketliri we yerlik hökümetlerning qerz patqiqigha pétishi, xitayning bezi jaylirida 2021-yildin buyan öy bahasining texminen %30 chüshüp kétishi, sana'et kirimining ötken bir yilda %17.8 Töwenlishi xitay iqtisadigha éghir zerbe bergen asasliq amillar hésablanmaqta.

Andirs korgha oxshash analizchilar xitay mallirigha yuqiri miqdarda tamozhna béji qoyush amérika üchün, bolupmu amérika sana'iti üchün paydiliq ikenlikini, bir tereptin amérikining éksportini köpeytse, yene bir tereptin amérikining xitay bilen bolghan iqtisadiy we siyasiy muzakiriliride amérika terepning qolini küchlendüridighanliqini ilgiri sürmekte.